O‘zbekiston Respublikasi Investitsiyalar, sanoat va savdo vazirligi

Investitsiyalarni jalb qilish jadal iqtisodiy o'sishning asosiy elementlaridan biridir. Shu nuqtai nazardan, mamlakatimizda ham mahalliy, ham xorijiy investorlarni qiziqtiradigan yangi, istiqbolli loyihalarni izlash borasida keng ko‘lamli ishlar amalga oshirilmoqda.

Surxondaryo viloyati hududidagi “Omonxona” turizm markazi mablag‘ aylanishining qisqa muddati va yuqori rentabellikka ega, shuningdek, yanada kengaytirish imkoniyatiga ega bo‘lgan shunday yuqori marjinal loyihalardan biridir.

Ma’lumot uchun: Surxondaryo viloyatining Boysun tumani o‘zining betakror an’analari, milliy liboslari, xalq og‘zaki ijodi namunalari, changqovuz kuylari bilan birga YUNESKO tomonidan “Og‘zaki va nomoddiy madaniy meros durdonalari” deb e’tirof etilib, 2008-yilda Insoniyatning nomoddiy madaniy merosi ro‘yxatiga kiritilgan. Har yili bu yerda “Boysun bahori” folklor festivali o‘tkaziladi, bu esa Surxondaryo viloyatini jahon turizm bozoriga olib chiqish uchun muhim asos yaratadi. Boysun tumaniga har yili 400 mingdan ortiq turist tashrif buyuradi. Asosiy diqqatga sazovor joylar orasida “Xo‘ja Qo‘chqor Ota” ziyoratgohi, “Qo‘rg‘oni Bolo” ibodatxonasi, “Hazrati Eshon” ibodatxonasi, “Teshik Tosh G‘ori” kabi ziyoratgohlar bor.

Boysun tumani ekoturizm, gastronomik va agroturizm sohalarida ixtisoslashganligi bilan tashrif buyuruvchilarni o‘ziga jalb qiladi. Mehmonlarga 9 ta mehmonxona, 3 ta sanatoriy va 40 dan ortiq mehmon uylari xizmat ko‘rsatadi. Bu yerda yangi ekzotik va ekstremal turistik yo‘nalishlar ochilgan bo‘lib, ulardan biri “Qora yulduz” yoki “Teskari Everest” nomi bilan mashhur dunyoning eng chuqur g‘oridir.

Mazkur investitsiya loyihasi turizm biznesi bilan shug‘ullanayotgan yoki ushbu yo‘nalishda ishlashni rejalashtirayotgan tashabbuskorlar uchun mo‘ljallangan, chunki obyekt gastronomik, sog‘lomlashtirish, ekstremal, ekologik turizm va ziyorat maqsadlari uchun qiziqarli hisoblanadi.

Loyihaga ko‘ra, 220,52 gektar maydonda qurilish va keyinchalik boshqarish uchun investorlarga quyidagi obyektlar taklif etiladi: terminal va bozor, restoran, mehmonxonalar, mehmon uylari, kafe, park, avtosalon, savdo markazlari, avtomobil texnik xizmat ko‘rsatish punktlari.

Shuni ta’kidlash kerakki, turizm loyihalarini amalga oshirishda 2023-yil 27-iyuldagi PQ-238-son “Turizm yo‘nalishidagi islohotlarni yanada jadallashtirish va sohada davlat boshqaruvi tizimini samarali tashkil qilish chora-tadbirlari to‘g‘risida”, PQ-3594-son “To‘g‘ridan-to‘g‘ri xususiy xorijiy investitsiyalarni jalb etishni rag‘batlantirish borasidagi qo‘shimcha chora-tadbirlar to‘g‘risida” qarorlari va investitsiya faoliyatiga oid boshqa normativ-huquqiy hujjatlarda belgilangan imtiyozlar qo‘llaniladi.

Sizni qiziqtirgan barcha savollar bo‘yicha kirish, ichki va ziyorat turizmini rivojlantirish bo‘limi boshlig‘i Behzod O‘roqovga +998 97 690 27 91 telefon raqami orqali murojaat qilishingiz mumkin.