Joriy yilning fevral oyida O‘zbekiston va Belarus o‘rtasida ikki tomonlama savdo aloqalarini kengaytirish va mahsulotlarni eksport qilish tartibotlarini yengillashtirish uchun qo‘shimcha shart-sharoitlar yaratish imkonini beruvchi tovarlarni sertifikatlashning elektron tizimlarini o‘zaro joriy etish to‘g‘risidagi bitim imzolandi.

Hujjat tovarlarning kelib chiqishini sertifikatlashning elektron tizimlarini joriy etish jarayonlarini yo‘lga qo‘yishni nazarda tutadi, bu esa tartib-taomillarni sezilarli darajada soddalashtiradi va O‘zbekiston va Belarus o‘rtasida savdo operatsiyalarini amalga oshiruvchi eksportchilar uchun vaqt xarajatlarini kamaytiradi.

Bitim qabul qilinganidan boshlab ikki davlat tomonidan bojxona organlari, sertifikatlashtirish organlari va boshqa tegishli idoralarga taalluqli Bitimni amalga oshirishga tayyorlash bo‘yicha bir qator tizimli chora-tadbirlar amalga oshirildi.

18-dekabr kuni O‘zbekiston Respublikasi Prezidentining "Xalqaro shartnomani tasdiqlash to‘g‘risida"gi PQ-448-son qarori bilan Bitim tasdiqlandi.

Hujjatga ko‘ra, sertifikatlarni berish tartib-taomillari sezilarli darajada soddalashtiriladi va qog‘oz hujjatlar almashinuvi to‘xtatiladi, sertifikatlarni berish va ularni bojxona organlari tomonidan tekshirish jarayonining shaffofligi ta’minlanadi.

Shu bilan birga, bojxona nazorati tartib-taomillari, tarif preferensiyalarini rasmiylashtirish va qo‘llash muddatlari sezilarli darajada qisqartiriladi va soddalashtiriladi.

Investitsiyalar, sanoat va savdo vazirligi Bitim qoidalarini amalga oshirish uchun mas’ul bo‘lgan vakolatli organ etib belgilandi. Bu ikki mamlakat eksportchilarini qo‘llab-quvvatlash bo‘yicha amalga oshirilayotgan tizimli ishlarning navbatdagi muhim qadamidir va bu ishlar davom ettiriladi.