Vashingtonda yetakchi kompaniyalar ishtirokida davra suhbati boʻlib oʻtdi
2024-12-22 11:00:00 / Yangiliklar
Joriy yilning 20-dekabr kuni O‘zbekiston Respublikasi Bosh vazirining o‘rinbosari Jamshid Xodjayev boshchiligidagi delegatsiyaning AQShga tashrifi doirasida Amerikaning yirik ishbilarmon doiralari vakillari bilan davra suhbati bo‘lib o‘tdi. Unda O‘zbekiston Respublikasi investitsiyalar, sanoat va savdo vazirining o‘rinbosari Akram Aliyev ham ishtirok etdi.
Tadbirda Cove Capital LLC, City, Bridge Capital Group, Creative Associates, FL Smith, dōTERRA, Creative Associates, FL Smith, dōTERRA, CalCity Industrial Park LLC, Crown Iron Works, Edvard, Austin, Nobel- Systems, North Coast Communications, Komatsu, JP Morgan, Minnesota Soybean Association kabi 40 dan ortiq yirik kompaniyalar va korporatsiyalar rahbarlari ishtirok etdi. Shuningdek, uchrashuvda O‘zbekiston-Amerika Savdo palatasi rahbariyati, Oq uy ma’muriyati va AQSh Savdo vazirligi ekspertlari ham ishtirok etdi.
Ishbilarmon doiralar vakillari O‘zbekistonni Jahon savdo tashkilotiga a’zo bo‘lish bo‘yicha AQSh bilan muzokaralar muvaffaqiyatli yakunlanganini olqishladilar va bu jarayon mamlakatimizning xalqaro iqtisodiy aloqalarini yanada mustahkamlashga xizmat qilishini ta’kidladilar.
O‘z navbatida, Amerika kompaniyalari rahbarlariga O‘zbekiston va AQSh o‘rtasidagi strategik sheriklik munosabatlarining rivojlanish dinamikasi, O‘zbekistonda xorijiy investorlar uchun yaratilgan keng imkoniyatlar taqdim etildi, yangi qo‘shma loyiha tashabbuslari taqdim etildi. Ishtirokchilar O‘zbekistondagi islohotlar natijalarini, xususan, tog‘-kon sanoati, axborot texnologiyalari va telekommunikatsiyalar, qishloq xo‘jaligi, mashinasozlik va agrosanoat majmuasi kabi sohalarda yaratilgan imkoniyatlarni yuqori baholadi.
Tadbir interaktiv tarzda o‘tkazildi: har bir kompaniya rahbari bilan davra suhbatida ham, G2B muzokaralarda ham hamkorlik istiqbollari atroflicha muhokama qilindi. Ishbilarmon doiralar vakillari muhokama etilgan loyihalarni muvaffaqiyatli amalga oshirish jarayonida O‘zbekiston hukumati har tomonlama yordam ko‘rsatishga to‘liq tayyor ekanligiga ishontirildi.
Davra suhbati yakunlari bo‘yicha tomonlar hamkorlikni mustahkamlash bo‘yicha kelgusi yil uchun harakatlar rejasini ishlab chiqishga kelishib oldilar.