Vyetnamning “ROX Group” kompaniyasi O‘zbekistonda loyihalarni amalga oshirishga tayyor
2024-12-14 21:00:00 / Yangiliklar
Joriy yilning 14-dekabr kuni O‘zbekiston Respublikasi Investitsiyalar, sanoat va savdo vaziri Laziz Kudratov Vyetnamning “ROX Group” kompaniyasi asoschisi Tuan Tran bilan uchrashdi.
Ma'lumot uchun: “Rox Group” 1996-yilda tashkil topgan. Faoliyatining asosiy yo'nalishlari: ko‘chmas mulk, texnologiya, mehmondo‘stlik va moliyaviy xizmatlar. Kompaniya 2023-yilda 2,4 milliard dollar daromad ko‘rgan. Kompaniyada 2000 dan ortiq xodimlar ishlaydi. U xalqaro bozorlarda, jumladan, Yevropada o‘z ishtirokini faol ravishda kengaytirmoqda.
Uchrashuvda Tuan Chan mamlakatimizda tadbirkorlar uchun yaratilgan shart-sharoitlarni, shuningdek, xorijiy investorlar uchun juda jozibador mexanizm bo‘lgan ustuvor yo‘nalishlarda tayyor, yuqori daromadli loyihalarni ishlab chiqish tizimi samaradorligini yuqori baholadi. O‘zbekiston iqtisodiyotining ochiqligi tufayli kompaniya turli loyiha takliflarini o'rganish va o‘ziga qulay investitsiya variantini tanlash imkoniyatiga ega bo‘ldi.
Xususan, “ROX Group” O‘zbekiston hududlarida uy-joy qurilishi va rekreatsion turizmni rivojlantirish yo‘nalishlarida loyihalarni amalga oshirishga sarmoya kiritmoqchi. Loyihalarga kompaniyaning katta tajribasi va innovatsion yechimlari jalb qilinadi.
Vyetnam tomoni vakillari vazirlik loyiha jarayonining barcha bosqichlarida har tomonlama ko‘mak ko‘rsatishga tayyor ekanligiga ishontirildi. “Rox Group” bilan hamkorlik O‘zbekiston qurilish va turizm sohasini rivojlantirishga katta hissa qo‘shishiga ishonch bildirildi.
Muzokaralar yakunida hamkorlikning muhokama qilingan yo‘nalishlari doirasida navbatdagi tadbirlar ishlab chiqildi va loyihalarni amalga oshirish jarayonida kompaniyani doimiy qo‘llab-quvvatlash uchun alohida investitsiya menejeri biriktirildi.