2024-yilning 10-dekabr kuni Investitsiyalar, sanoat va savdo vaziri Laziz Kudratov Venesuela Bolivar Respublikasining Favqulodda va Muxtor Elchisi Rosalba Lo Bue Antiko bilan uchrashdi.

Muzokaralar chog‘ida ikki tomonlama hamkorlikning bugungi holati va uni yanada rivojlantirishning asosiy yo‘nalishlari muhokama qilindi. Tomonlar fikricha, joriy yilning 10 oyida o‘zaro tovar ayirboshlash hajmi 4 barobar oshgan bo‘lsa-da, bu borada ikkala tomon ham barcha mavjud resurs va salohiyatdan foydalanishi zarur.

Shu nuqtai nazardan, savdo aloqalarini rivojlantirish, ichki va tashqi bozorlarga yo‘naltirilgan qo‘shma investitsiya loyihalarini amalga oshirish bo‘yicha bor imkoniyatlar atroflicha tahlil qilindi. Shu o‘rinda, har ikki davlatning o‘zaro manfaatli tashabbuslarini har tomonlama qo‘llab-quvvatlashga tayyorlik bildirildi.

To‘qimachilik sanoati, transport va logistika, talab yuqori bo‘lgan mahsulotlar ishlab chiqarish bo‘yicha sanoat kooperatsiyasi, savdo munosabatlari birgalikda ish olib borish uchun eng ustuvor yo‘nalishlar sifatida belgilandi.

Elchi Rosalba Lo Bue Antiko O‘zbekistonda yaratilgan investitsiyaviy muhit hatto eng ehtiyotkor investorlar ishonchini qozonishga qodirligini yuqori baholadi va Venesuela ishbilarmon doiralarini ochilayotgan yangi imkoniyatlar bilan tanishtirishga ishontirdi.

Uchrashuv yakunida tomonlar hamkorlikni jadallik bilan chuqurlashtirishga kelishib oldilar hamda muhokama qilingan loyiha va tashabbuslarni amalga oshirish bo‘yicha qo‘shma tadbirlar rejasi va operativ hamkorlik mexanizmlarini ishlab chiqdilar.