O‘zbekiston Respublikasi Investitsiyalar, sanoat va savdo vazirligi

Joriy yilning 3 dekabr kuni O‘zbekiston Respublikasi Investitsiyalar, sanoat va savdo vaziri Laziz Kudratov Rossiya Federatsiyasi Prezidenti huzuridagi Rossiya Xalq xo‘jaligi va davlat boshqaruvi akademiyasi (RXXDBA) rektori Aleksey Komissarov bilan uchrashdi.

Suhbatda tomonlar Rossiya Federatsiyasining yetakchi ilm-fan va ta’lim muassasasi RXXDBA negizida respublika davlat organlarining 150 nafar vakillari uchun malaka oshirish kurslarini tashkil etish bo‘yicha olib borilgan dastlabki ishlar natijalarini muhokama qildilar.

“O‘zbekiston – 2030” strategiyasida mamlakatimizda kadrlar zaxirasini shakllantirish va tayyorlash bo‘yicha kompleks vazifalar belgilangani qayd etildi. O‘zbekiston milliy iqtisodiyotini rivojlantirishdagi dolzarb muammolarni hal etish uchun zarur bo‘lgan yo‘nalishlar bo‘yicha kadrlar tayyorlash maqsadida modullar mavzulari bo‘yicha tegishli takliflar kiritildi.

Uchrashuv doirasida O‘zbekiston Respublikasi Investitsiyalar, sanoat va savdo vazirligi va Rossiya Federatsiyasi Prezidenti huzuridagi Rossiya xalq xo‘jaligi va davlat boshqaruvi akademiyasi o‘rtasida hamkorlik to‘g‘risidagi memorandum imzolandi.

Tadbir yakunlari bo‘yicha tomonlar Memorandumning muvaffaqiyatli amalga oshirilishiga ishonch bildirdilar. Bu o‘z navbatida davlat organlarini kadrlar bilan ta’minlash sifatini oshirishga xizmat qiladi. Akademik, ilmiy va madaniy almashinuvlar hamda ta’lim va madaniy dasturlarni amalga oshirish sohasidagi O‘zbekiston-Rossiya hamkorligining yanada chuqurlashishiga ishonch bildirildi.