O‘zbekiston Respublikasi Investitsiyalar, sanoat va savdo vazirligi

Joriy yilning 28-noyabr kuni Toshkentda "Ostim" birlashgan sanoat zonasi raisi Orxan Aydin boshchiligidagi turk ishbilarmonlari delegatsiyasining tashrifi doirasida o‘zbek-turk biznes-forumi bo‘lib o‘tdi.

Unda investitsiyalar, sanoat va savdo vaziri o‘rinbosari Akram Aliyev, mahalliy hokimiyat organlari, erkin iqtisodiy va sanoat zonalari rahbarlari, elektr texnikasi, kimyo mahsulotlari, qurilish materiallari ishlab chiqarish, IT, metallurgiya, ta’lim, turizm, savdo va boshqa sohalarda faoliyat yuritayotgan 200 dan ortiq yirik kompaniyalar vakillari ishtirok etdi.

Qutlov so‘zi bilan chiqish qilgan spikerlar, o‘zbek-turk o‘zaro ko‘p qirrali munosabatlar ko‘rsatkichlari barcha yo‘nalishlarda sezilarli darajada oshganini ta’kidladilar. Oxirgi besh yil ichida ikki davlat o‘rtasidagi savdo hajmi 1,3 baravarga o‘sib, 3,1 milliard dollarga yetdi. Mamlakatlar o‘rtasida Imtiyozli savdo to‘g‘risidagi bitim imzolangan, uning doirasida mahsulotlar ro‘yxatini kengaytirish bo‘yicha faol ishlar olib borilmoqda.

So‘nggi besh yil ichida qo‘shma korxonalar soni deyarli uch baravarga oshib, 1903 taga yetdi. Faqatgina joriy yil boshidan buyon 300 dan ortiq yangi turk kompaniyalari tashkil etildi. 2023-yilda 1,2 milliard dollar miqdorida investitsiyalar o‘zlashtirildi.

Turkiyaning “Unitrade”, “Esan”, “MTA”, “Menderes”, “Zorlu”, “Abdi Ibrahim”, “Calik”, “Aksa”, “Tashyapi”, “Dolsar”, “Jengiz”, “Anadolu” kabi yirik kompaniyalari konchilik va geologiya, to‘qimachilik mahsulotlari ishlab chiqarish, farmatsevtika, qishloq xo‘jaligi, avtomobil sanoati va energetika sohalarida yirik loyihalarni amalga oshirib kelmoqda.

Forum davomida turk kompaniyalariga O‘zbekistonga investitsiya kiritish uchun yaratilgan qulay sharoitlar taqdim etildi. Asosiy jihatlar qatorida soliq va bojxona imtiyozlari, barqaror iqtisodiy o‘sish, “GSP+” dasturi doirasida Yevropa bozorlariga imtiyozli eksport qilish imkoniyatlari, JSTga qo‘shilish bo‘yicha faollashgan ishlar hamda rivojlangan infratuzilma va muhandislik kommunikatsiyalariga ega ko‘plab erkin iqtisodiy va sanoat zonalari tashkil etilganligi qayd etildi.

Turk kompaniyalariga hozirgi loyihalarni muvaffaqiyatli amalga oshirish hamda yangi investitsiyaviy tashabbuslarni yo‘lga qo‘yishda har tomonlama yordam berishga tayyorlik bildirildi.

Forum doirasida B2B muzokaralari tashkil etilib, ikki davlat tadbirkorlari o‘zaro yangi foydali aloqalar o‘rnatish va yangi qo‘shma loyihalarning tashkiliy mexanizmlarini muhokama qilish imkoniga ega bo‘ldilar.

Dasturga muvofiq, Toshkent viloyati Zangiota tumanida “Ostim global sanoat zonasi” ochilish marosimi ham bo‘lib o‘tdi. Ishbilarmon doiralarga yangi sanoat zonasida yaratilgan sharoitlar taqdim etilib, turk kompaniyalari ushbu hududda o‘z ishlab chiqarish korxonalarini tashkil etishga chaqirildi.

Ma’lumot uchun: “Ostim” sanoat zonasi hududi 100 gektarni tashkil etadi. Loyiha umumiy qiymati – 150 million dollar. Zona barcha muhandislik kommunikatsiyalari bilan ta’minlangan, elektr tokiga bo‘lgan ehtiyojlarning bir qismini qondirish uchun quyosh elektr stansiyasi qurilmoqda. Klaster usulida tashkil etilgan zonada savdo markazi, poliklinika, maktab, mehmonxona, tadqiqot va sertifikatlash bo‘yicha ilmiy markaz (R&D) hamda ishlab chiqarish korxonalari uchun zarur kasblarga o‘rgatadigan kasb-hunar kolleji kabi ijtimoiy ob’ektlar qurilishi rejalashtirilgan.