Joriy yilning 23-noyabr kuni O‘zbekiston Respublikasi Bosh vazirining o‘rinbosari Jamshid Xodjayev va O‘zbekiston Respublikasi investitsiyalar, sanoat va savdo vaziri Laziz Kudratov Toshkent shahrida investitsiyalar, sanoat va savdo vazirligining hududlardagi 700 dan ortiq rahbar va xodimlari uchun investitsiyalar, savdo va xalqaro hamkorlik sohasida ustuvor vazifalarni amalga oshirish bo'yicha tashkil etilgan o‘quv-seminarda ishtirok etdi.

Trening doirasida investitsiyalarni jalb qilish, savdo munosabatlarini kuchaytirish, xorijiy hamkorlar bilan to‘g‘ridan-to‘g‘ri aloqalarni yo‘lga qo‘yish va mustahkamlashning samarali usullariga bag‘ishlangan mashg‘ulotlar o‘tkazildi. Mutaxassislarning ta'kidlashicha, trening ko'p yillik to'plangan tajribaning "qaymog'ini" o‘zida jamladi va ishning natijalarini sezilarli darajada oshirishga imkon beradi.

Investitsiyalar, sanoat va savdo vaziri o‘rinbosarlari Xurram Teshabayev, Akram Aliyev va Shoxrux Gulamovlar tegishli mavzularda ma’ruza qildilar.

Xususan, hamkorlikni yoʻlga qoʻyish, oliy va yuqori darajadagi tashriflar, hukumatlararo komissiyalar doirasidagi kelishuvlar, shuningdek, turli mamlakatlar bilan koʻp qirrali hamkorlik doirasidagi davom etayotgan hamkorlik chogʻida erishilgan investitsiya bitimlarini ishlab chiqish, amalga oshirish va doimiy monitoring qilish boʻyicha bosqichma-bosqich koʻrsatmalar berildi.

Hududlarning muvaffaqiyatli tajribasi misolida investitsiyalarni jalb qilish mexanizmlari, jumladan: mehnat resurslari, transport va logistika imkoniyatlari, boshqa raqobatdosh ustunliklarni chuqur tahlil qilish, natijador loyihaviy tashabbuslarni ishlab chiqish, potentsial investorlarni axborot bilan to‘liq ta’minlash, muzokaralar olib borish va aniq kelishuvlarga erishish mexanizmlari namoyish etildi.

Taqdimotlarda investorlar muammolarini davlat xizmatlari samaradorligini, biznesni himoya qilish vositalarining mavjudligi va sifatini, infratuzilmaning rivojlanish darajasi, moliyaviy va boshqa resurslar mavjudligini baholash nuqtai nazaridan o‘rganish masalalari muhokama qilindi.

Bir qator Yevropa va Yaqin Sharq mamlakatlari bozorlariga tovarlarni yetkazib berishning tajribalari misolida xorijiy mamlakatlar bozorlariga eksport yetkazib berishni tashkil etish va yanada kengaytirish masalalariga alohida mavzu bag‘ishlandi.

Shuningdek, Laziz Kudratov trening ishtirokchilariga vazirlik va uning hududiy bo‘linmalari faoliyatini takomillashtirish maqsadida yangicha ishlash tizimini joriy etish bo‘yicha aniq topshiriqlar berdi.