O‘zbekiston Respublikasi Investitsiyalar, sanoat va savdo vazirligi

O‘zbekiston Respublikasi Investitsiyalar, sanoat va savdo vazirligi vakillari Vashingtonda AQShning CNH Industrial, Abbott, Medtronic, Cintana, HP, Caterpillar, Coca-Cola, Sierra Nevada Corporation, John Deere, Boeing, Stirling Foundation, Cove Capital, Bridge Capital Group, Stantec Inc va boshqa O‘zbekistonda faoliyat olib borayotgan yirik  kompaniyalar vakillari bilan bo‘lib o‘tgan davra suhbatida ishtirok etdilar.

Shuningdek, tadbirda, AQSh Oq uyi, Davlat departamenti, Savdo vazirligi va CLDP dasturi rasmiylari ishtirok etdi.

Yig‘ilishda investitsiyalar, sanoat va savdo vaziri maslahatchisi Abdulla Hoshimov, tashqi ishlar vaziri o‘rinbosari Muzaffarbek Madrahimov va O‘zbekistonning Vashingtondagi elchisi Furqat Siddiqov hamda Amerika tomoni vakillari so‘zga chiqdilar.

AQSh Davlat kotibi yordamchisining oʻrinbosari Mark Pomersheym 13-noyabr kuni Milliy xavfsizlik kengashi, Savdo vazirligi, Mudofaa vazirligi, USAID, ikki mamlakatning tegishli vazirlik va idoralari vakillari, shuningdek, AQSh Davlat departamenti rahbariyati vakillari ishtirokida Vashingtonda boʻlib oʻtgan Oʻzbekiston-Amerika strategik sheriklik muloqoti majlisining IV raundini yuqori baholadi. Tomonlar xususiy sektor vakillari o‘rtasidagi o‘zaro hamkorlikni kengaytirish, AQSh va O‘zbekiston o‘rtasidagi savdo va sarmoyaviy hamkorlikni diversifikatsiya qilish maqsadida ushbu formatni kengaytirilgan strategik sheriklik muloqotiga aylantirishga kelishib oldilar.

O‘zbekiston-Amerika Savdo palatasi (O‘zASP) va “CNH Industrial” kompaniyasi prezidenti S.Naderne uning kompaniyasi O‘zbekistondagi eng birinchi investorlardan biri bo‘lib, o‘z faoliyatini 90-yillarning boshlarida boshlaganini ta’kidladi. – Shu vaqt ichida to‘rtta qo‘shma korxona tashkil etildi, ular joriy yilda iqtisodiyotni liberallashtirish borasidagi islohotlar tufayli muvaffaqiyatli xususiylashtirildi va to‘liq modernizatsiya qilindi, – dedi u.

AQSh Savdo vazirligi direktori M.Edvards O‘zbekistonda amalga oshirilayotgan islohotlarning ijobiy natijalari O‘zbekiston-Amerika strategik sherikligini chuqurlashtirish uchun yangi imkoniyatlar ochayotganini alohida ta’kidladi.

Las-Vegasdagi Mine Expo ko‘rgazmasida O‘zbekiston delegatsiyasining muvaffaqiyatli ishtirok etishiga alohida e’tibor qaratilmoqda. AQSh Savdo vazirligi O‘zbekistonga navbatdagi savdo missiyasini tashkil etishni rejalashtirmoqda.

Oq uy vakili B.Todd Amerika Qo‘shma Shtatlari va O‘zbekiston o‘rtasida kengaytirilgan strategik sheriklik munosabatlarini yo‘lga qo‘yish muvaffaqiyatini ta’kidlar ekan, xususiy kompaniyalar va davlat idoralari o‘rtasidagi muloqot va o‘zaro hamkorlik muhimligini ta’kidladi.

Apple kompaniyasining xalqaro aloqalar bo‘yicha direktori J.Kun raqamli platformalarni tartibga solish va O‘zbekiston hukumati bilan o‘zaro munosabatlarga oid bir qancha muhim fikrlarni ta’kidladi. U O‘zbekiston hukumatiga bu boradagi konstruktiv va tizimli hamkorlik uchun minnatdorlik bildirdi.

Davra suhbati yakunida navbatdagi O‘zbekiston-Amerika biznes-forumini O‘zbekistonda o‘tkazish, Amerikaning yetakchi korporatsiyalari ishtirokida yangi investitsiya loyihalarini ishlab chiqish bo‘yicha kelishuvga erishildi.