Shu yilning 10-11 noyabr kunlari O‘zbekiston Respublikasi Investitsiyalar, sanoat va savdo vaziri Laziz Kudratov boshchiligidagi O‘zbekiston delegatsiyasi Qatar Davlatida amaliy tashrif bilan bo‘ldi.

Tashrif dasturi doirasida Iqtisodiy hamkorlik bo‘yicha hukumatlararo komissiyaning birinchi yig‘ilishi va O‘zbekiston-Qatar biznes forumida ishtirok etildi, ushbu mamlakatning yirik kompaniyalari rahbarlari bilan uchrashuv va muzokaralar o‘tkazildi.

Laziz Kudratov HK yig‘ilishidagi qutlov nutqida O‘zbekiston-Qatar hamkorligini rivojlantirish uchun IT-texnologiyalari, savdo, investisiya, agrosanoat, ekologiya, transport va logistika, ta’lim va sog'liqni saqlash, madaniyat, turizm va sport sohalaridagi salohiyatdan to‘liq foydalanish muhimligini ta’kidladi.

Konstruktiv fikr almashish chog‘ida ikki tomonlama hamkorlik kun tartibining barcha asosiy yo‘nalishlari to‘liq ochib berildi, keng ko‘lamli masalalar muhokama qilindi va o‘zaro hamkorlikni izchil rivojlantirish bo‘yicha aniq qadamlar belgilandi.

O‘z navbatida, Qatar Savdo va sanoat vaziri va Qatar delegatsiyasi rahbari Shayx Muhammad Al-Tani ham savdo-iqtisodiy hamkorlik sezilarli darajada o‘sib borayotganini, Qatar biznesining O‘zbekistonga bo‘lgan ishonchini ta’kidlab, qo‘llab-quvvatlashga va ikki tomonlama hamkorlik kun tartibiga yangi tashabbuslarni qoʻshishga tayyorligini bildirdi.

Soʻngra Oʻzbekiston-Qatar biznes-forumi boʻlib oʻtdi, unda ikki mamlakatning 100 dan ortiq yetakchi kompaniyalari vakillari ishtirok etdi. Tadbirda O‘zbekistonda investitsiya faoliyatini yuritish uchun yaratilgan ulkan imkoniyatlar, shuningdek, to‘qimachilik va oziq-ovqat sanoati, qishloq xo‘jaligi, tog‘-kon-metallurgiya, energetika va neft-kimyo, sog‘liqni saqlash va farmatsevtika, transport va logistika kabi eng istiqbolli tarmoqlar bo‘yicha bir qator o‘zaro manfaatli loyiha ishlanmalari hamda davlat korxonalarini xususiylashtirish dasturi ishtirokchilari uchun ochilayotgan imkoniyatlar taqdim etildi.

O‘zbekistonning istiqbolli sarmoyaviy imkoniyatlarni belgilashdan tortib, biznesni tashkil etish va rivojlantirishgacha bo‘lgan barcha bosqichlarda har tomonlama qo‘llab-quvvatlash choralarini ko‘rishga tayyorligi bildirildi.

Tashrif doirasida Laziz Kudratov Qatarning gaz-kimyo, energetika, IT-texnologiyalari, sog‘liqni saqlash, turizm, chorvachilik, qurilish materiallari ishlab chiqarish kabi sohalarga ixtisoslashgan kompaniyalari rahbarlari bilan ham uchrashuvlar o‘tkazdi.

Umuman olganda, ikki tomon taʼkidlaganidek, tashrif davomida erishilgan kelishuvlar Oʻzbekistonda amalga oshirilayotgan islohotlar sifati, investitsiya muhiti samaradorligi va sanoatning turli tarmoqlariga toʻgʻridan-toʻgʻri sarmoya kiritishga tayyor boʻlgan investorlarning ishonchini koʻrsatadi.