O‘zbekiston va Germaniya 2026–2027-yillarda 8 ta loyihani moliyalashtirish bo‘yicha kelishuvga erishdi
2026-10-07 20:00:00 / Yangiliklar
7-oktabr kuni Toshkent shahrida O‘zbekiston Respublikasi Hukumati va Germaniya Federativ Respublikasi Hukumati o‘rtasida 2026–2027-yillarga mo‘ljallangan moliyaviy va texnik hamkorlik masalalari bo‘yicha hukumatlararo muzokaralar bo‘lib o‘tdi.
O‘zbekiston delegatsiyasiga Investitsiyalar, sanoat va savdo vaziri o‘rinbosari Akrom Aliyev, Germaniya delegatsiyasiga esa Germaniya Iqtisodiy hamkorlik va taraqqiyot federal vazirligining Markaziy Osiyo, Pokiston va Afg‘oniston masalalari bo‘yicha bo‘lim boshlig‘i Kristiane Amari rahbarlik qildi.
Muzokaralar davomida “yashil” iqtisodiyot, kasb-hunar ta’limi, texnik tartibga solish, energetika, davlat boshqaruvi va ijtimoiy himoya sohalaridagi ikki tomonlama hamkorlikning ustuvor yo‘nalishlari muhokama qilindi.
Muzokaralar doirasida Germaniya tomoni tomonidan 2026–2027-yillarda 8 ta loyihani moliyalashtirish bo‘yicha kelishuvga erishildi.
Tadbir yakunida O‘zbekiston Respublikasi Hukumati va Germaniya Federativ Respublikasi Hukumati o‘rtasida rivojlanish maqsadlaridagi hamkorlik masalalari bo‘yicha muzokaralar bayonnomasi imzolandi.