Farg‘onada O‘zbekiston–Rossiya hukumatlararo komissiyasining navbatdagi yig‘ilishi bo‘lib o‘tdi
2026-10-07 17:10:00 / Yangiliklar
2026-yil 6-oktabr kuni Farg‘ona shahrida O‘zbekiston Respublikasi va Rossiya Federatsiyasi o‘rtasidagi iqtisodiy hamkorlik bo‘yicha Hukumatlararo komissiyaning 27-yig‘ilishi bo‘lib o‘tdi.
O‘zbekiston delegatsiyasiga Bosh vazir o‘rinbosari Jamshid Xodjayev, Rossiya delegatsiyasiga esa Rossiya Federatsiyasi Hukumati Raisining birinchi o‘rinbosari Denis Manturov rahbarlik qildi.
Nutqlarda avvalgi yig‘ilishdan so‘ng ikki tomonlama hamkorlik kun tartibi sezilarli darajada kengaygani qayd etildi. Ikki davlat rahbarlari o‘rtasida erishilgan kelishuvlarni amalga oshirishda Komissiyaning muhim o‘rni alohida ta’kidlandi.
O‘zaro savdo masalasi muhokamalarning asosiy mavzularidan biri bo‘ldi. 2026-yilning sakkiz oyi davomida uning hajmi 10 foizga oshib, 9 mlrd dollardan oshdi.
O‘zaro yetkazib berish hajmining ortishi sanoat kooperatsiyasining chuqurlashuvi bilan birga kechmoqda. 2026-yilda kimyo sanoati, qishloq xo‘jaligi mahsulotlarini qayta ishlash va metallga ishlov berish sohalarida 16 ta qo‘shma ishlab chiqarishni ishga tushirish rejalashtirilgan.
Energetika sohasida Jizzax viloyatida atom elektr stansiyasini qurish, milliy kadrlarni tayyorlash, shuningdek, uskunalar va xizmatlarni mahalliylashtirish masalalariga alohida e’tibor qaratildi.
Iqtisodiy masalalar bilan bir qatorda, ishtirokchilar gumanitar aloqalar va turizmni rivojlantirish istiqbollarini ham muhokama qildilar. 2025-yilda O‘zbekistonga qariyb 1 mln nafar rossiyalik sayyoh tashrif buyurdi.
Yig‘ilish yakunida Hukumatlararo komissiyaning 27-yig‘ilishi bayonnomasi hamda Rossiya va O‘zbekistonning 2026–2040-yillarga mo‘ljallangan ilmiy-texnologik rivojlanish strategiyasi imzolandi.