Özbekiston Respublikasi Investitsiyalar, sanoat va savdo vazirligi

2-oktabr kuni Toshkent shahrida O‘zbekiston-Daniya biznes davra suhbati bo‘lib o‘tdi. Unda O‘zbekiston Respublikasi investitsiyalar, sanoat va savdo vaziri Laziz Kudratov ishtirok etdi. O‘zbekiston delegatsiyasiga Bosh vazir o‘rinbosari Jamshid Xodjayev, Daniya delegatsiyasiga esa Daniya Qirolligi tashqi ishlar vaziri Lars Løkke Rasmussen boshchilik qildi. Tadbirda, shuningdek, ikki mamlakatning tegishli vazirlik va idoralari rahbarlari hamda biznes vakillari ishtirok etdi.

Muloqot davomida O‘zbekiston-Daniya iqtisodiy aloqalari tobora amaliy tus olayotgani qayd etildi. Tog‘-kon sanoati, suv xo‘jaligi, energetika, qishloq xo‘jaligi va ishlab chiqarish sohalarida hamkorlik tajribasi shakllangan. Yangi kun tartibi transport va logistika, raqamli yechimlar, texnologik modernizatsiya hamda zamonaviy moliyaviy vositalarni qamrab oladi.

Daniya biznesining salohiyatini inobatga olgan holda, tomonlar qo‘shma hamkorlikni yanada rivojlantirish mumkin bo‘lgan yo‘nalishlarga e’tibor qaratdilar. Transport sohasida multimodal va konteyner logistikasini rivojlantirish, terminal infratuzilmasi va zamonaviy ta’minot zanjirlari masalalari ko‘rib chiqildi. Tog‘-kon sanoatida uskunalarni mahalliylashtirish, servis quvvatlarini rivojlantirish va resurs tejovchi texnologiyalarni joriy etishga alohida urg‘u berildi.

Energetika va suv xo‘jaligida katta salohiyat mavjudligi ta’kidlandi. Daniya kompaniyalarining qayta tiklanuvchi energetika va energiya samaradorligini oshirish loyihalarida ishtiroki, suv ta’minoti va irrigatsiya infratuzilmasini modernizatsiya qilish, energiya tejamkor nasos uskunalari hamda intellektual boshqaruv tizimlarini joriy etish masalalari muhokama qilindi. Neft-gaz va energetika tarmoqlarida raqamli yechimlarni qo‘llash ham istiqbolli yo‘nalish sifatida qayd etildi.

Agrosanoat sohasida oziq-ovqat ishlab chiqarishni rivojlantirish, mahalliylashtirish va eksport salohiyatini kengaytirish imkoniyatlari ko‘rib chiqildi. Tarmoq tashabbuslari bilan bir qatorda sanoat, energetika, suv va qishloq xo‘jaligi, sog‘liqni saqlash hamda logistika sohalaridagi loyihalarni uzoq muddatli va imtiyozli moliyalashtirish mexanizmlari ham muhokama qilindi.

Muhokamalarning amaliy ruhda o‘tishiga Daniyaning yetakchi kompaniya va institutlari ishtiroki xizmat qildi. FLSmidth, Grundfos, Maersk, AVK International, Scan Global Logistics, Carlsberg, ByteAll Energy hamda Daniyaning Eksport va investitsiya jamg‘armasi - EIFO o‘z yondashuv va tashabbuslarini taqdim etdi. Muhokamalar markazida texnologik kooperatsiya, mahalliylashtirish, infratuzilmani rivojlantirish, moliyalashtirish va o‘zbekistonlik hamkorlar bilan to‘g‘ridan-to‘g‘ri aloqalarni yo‘lga qo‘yish masalalari bo‘ldi.

Ushbu ishlarni tizimli asosda davom ettirish maqsadida davra suhbati yakunlari bo‘yicha O‘zbekiston Respublikasi Investitsiyalar, sanoat va savdo vazirligi hamda Daniya Qirolligi Tashqi ishlar vazirligi o‘rtasida Savdo-iqtisodiy va investitsiyaviy hamkorlik bo‘yicha ikki tomonlama komissiyani tashkil etish to‘g‘risida Anglashuv memorandumi imzolandi. Yangi mexanizm davlat organlari va biznes o‘rtasida muntazam muloqot olib borish, ustuvor yo‘nalishlarni belgilash, qo‘shma tashabbuslarni ilgari surish va ikki mamlakat kompaniyalarining aniq takliflarini ko‘rib chiqish uchun maydon bo‘lib xizmat qiladi.

Ishbilarmonlik dasturi belgilangan tashabbuslarni yanada chuqur ishlab chiqish va yangi sheriklik aloqalarini shakllantirishga bag‘ishlangan B2B va B2G muzokaralari bilan davom etdi.