O‘zbekiston Respublikasi Investitsiyalar, sanoat va savdo vazirligi

O‘zbekiston va AFD 2027–2030-yillarga mo‘ljallangan hamkorlikning ustuvor yo‘nalishlarini belgilab oldi

25-sentabr kuni Toshkent shahrida O‘zbekiston Respublikasi Hukumati va Fransiya taraqqiyot agentligi (AFD) o‘rtasida 7-yillik maslahatlashuvlar bo‘lib o‘tdi. O‘zbekiston tomoniga investitsiyalar, sanoat va savdo vaziri o‘rinbosari Shoxrux G‘ulomov, Fransiya tomoniga esa AFDning Sharqiy Yevropa, Yaqin Sharq va Osiyo departamenti direktori o‘rinbosari Virjini Bleytrax rahbarlik qildi. Tadbirda, shuningdek, Strategik islohotlar agentligi, ikki mamlakat diplomatik vakolatxonalari hamda AFDning O‘zbekistondagi vakolatxonasi vakillari ishtirok etdi.

Maslahatlashuvlar davomida O‘zbekiston Respublikasi Prezidentining 2025-yil mart oyida Fransiyaga amalga oshirgan davlat tashrifi va ikki tomonlama munosabatlarning strategik sheriklik darajasiga ko‘tarilishidan so‘ng erishilgan kelishuvlarni, jumladan, taraqqiyotni moliyalashtirish sohasida aniq mazmun bilan boyitish alohida ahamiyat kasb etayotgani ta’kidlandi.

Ma’lumot uchun: so‘nggi 11 yil davomida O‘zbekistonning AFD bilan hamkorligi sifat jihatidan yangi bosqichga ko‘tarildi. 2015-yildan buyon Agentlik tomonidan umumiy qiymati qariyb 1,6 mlrd yevro bo‘lgan 17 ta loyiha ma’qullangan. Amaldagi portfel energetika, suv ta’minoti va sanitariya, chorvachilik, raqamlashtirish, moliya sektori va boshqa yo‘nalishlardagi umumiy qiymati 1,29 mlrd yevro bo‘lgan 13 ta loyihani o‘z ichiga oladi. O‘zlashtirilgan mablag‘lar hajmi qariyb 1 mlrd yevroga yoki imzolangan bitimlar umumiy qiymatining 78 foiziga yetdi.

Ta’kidlanganidek, hamkorlikning muhim jihatlaridan biri AFD guruhining kompleks yondashuvidir. AFD orqali davlat loyihalarini moliyalashtirish bilan bir qatorda, xususiy sektor yo‘nalishida Proparco va texnik ekspertiza bo‘yicha Expertise France bilan ham hamkorlik rivojlantirilmoqda. Yevropa Ittifoqi va Fransiya Hukumati bilan birgalikda 55 mln yevrodan ortiq grant mablag‘lari jalb qilingan.

Hozirgi bosqichda asosiy e’tibor amaldagi loyihalarni o‘z vaqtida amalga oshirish, yangi tashabbuslarni tayyorlashni jadallashtirish, konsepsiyalardan moliyalashtirish bosqichiga o‘tish, shuningdek, moslashuvchan moliyaviy vositalardan kengroq foydalanishga qaratilgan. Hozirda umumiy qiymati 604,2 mln yevro bo‘lgan to‘qqizta loyiha tayyorlanmoqda.

Mazkur ishlar 2027–2030-yillarga mo‘ljallangan hamkorlikning navbatdagi bosqichi uchun asos yaratmoqda. Ustuvor yo‘nalishlar qatorida energetik o‘tish va dekarbonizatsiya, suv ta’minoti, qishloq xo‘jaligi, shaharlarning barqaror rivojlanishi, xususiy sektorni qo‘llab-quvvatlash hamda davlat moliyasini boshqarishni takomillashtirish belgilandi.

Ushbu kun tartibini rivojlantirish doirasida umumiy taxminiy qiymati 1,125 mlrd yevro bo‘lgan 11 ta loyihadan iborat indikativ portfel taqdim etildi. U energetika va transport infratuzilmasini modernizatsiya qilish, shaharlarni rivojlantirish, irrigatsiya va qishloq xo‘jaligi, “yashil” iqtisodiyot, shuningdek, nosuveren moliyalashtirishni kengaytirishni qamrab oladi. Yirik tashabbuslar qatoriga Toshkent–Samarqand temir yo‘l liniyasini reabilitatsiya qilish hamda poytaxt jamoat transportini rivojlantirish kiradi.

Tayyorlashning ilg‘or bosqichida bo‘lgan loyihalarga alohida e’tibor qaratildi. Tomonlar Qashqadaryo viloyatida ichimlik suvi ta’minoti tizimlarini modernizatsiya qilish, Qoraqalpog‘istondagi “Suyenli” kanalini rekonstruksiya qilish, Orolbo‘yi hududidagi loyihalarni amalga oshirish va issiqlik tarmoqlarini yangilash bo‘yicha ishlarni jadallashtirish, shuningdek, energetika va kommunal infratuzilma loyihalarini tayyorlashni davom ettirish niyatida.

Erishilgan kelishuvlar maslahatlashuvlar bayonnomasida mustahkamlandi va qo‘shma monitoringga olindi. Navbatdagi, 8-yillik maslahatlashuvlarni Fransiyada o‘tkazish rejalashtirilgan.