O‘zbekiston Respublikasi Investitsiyalar, sanoat va savdo vazirligi

19-sentabr kuni Toshkentda O‘zbekiston Respublikasi investitsiyalar, sanoat va savdo vaziri Laziz Qudratov, Suriya Arab Respublikasi iqtisodiyot va sanoat vaziri Muhammad Nidal ash-Shaar, shuningdek, ikki mamlakat savdo-sanoat birlashmalari rahbarlari ishtirokida O‘zbekiston–Suriya biznes-forumi bo‘lib o‘tdi.

Suriya tomonidan to‘qimachilik, farmatsevtika, oziq-ovqat va kimyo sanoati, qishloq xo‘jaligi, qurilish materiallari ishlab chiqarish, elektrotexnika hamda boshqa tarmoqlarda faoliyat yuritayotgan 30 dan ortiq yirik kompaniya rahbarlari ishtirok etdi. Tarmoqlarning keng qamrovda namoyon bo‘lishi muhokamalarni savdo va investitsiyaviy hamkorlikning eng istiqbolli yo‘nalishlariga qaratish imkonini berdi.

Nutqlarda forum bir kun avval hukumatlararo muzokaralar doirasida erishilgan kelishuvlarning mantiqiy davomi bo‘lgani ta’kidlandi. Imzolangan Qo‘shma iqtisodiy va savdo qo‘mitasini tashkil etish to‘g‘risidagi memorandum hamda tuzilgan Ishbilarmonlar kengashi ikki mamlakat davlat idoralari va biznes vakillarining muntazam hamkorligi uchun institutsional asos yaratdi.

Yangi ko‘rgazma va savdo maydonchalari kompaniyalar o‘rtasidagi bevosita aloqalarni rivojlantirishga xizmat qiladi. 2027-yil fevral oyida Halab va Damashq shaharlarida “Made in Uzbekistan” ko‘rgazmasini, shu yil davomida esa Toshkentda Suriya mahsulotlari ko‘rgazmasini o‘tkazish rejalashtirilmoqda. Halab shahrida faoliyat yuritayotgan O‘zbekiston savdo uyining o‘rni alohida ta’kidlandi. U mamlakatimiz mahsulotlarini ilgari surish, hamkorlar topish va yangi tashabbuslarni rivojlantirish uchun doimiy maydon bo‘lib xizmat qilishi ko‘zda tutilgan.

Forum davomida tadbirkorlarning ikki mamlakat bozorlariga chiqishini qo‘llab-quvvatlash bo‘yicha aniq choralar ham belgilandi. O‘zbekiston kompaniyalariga omborlar ijarasi, sertifikatlashtirish va tashish xarajatlarini subsidiyalashni o‘z ichiga olgan ko‘mak ko‘rsatish nazarda tutilgan. O‘zbekistonda faoliyat yuritishga qiziqish bildirgan Suriya biznesiga mahalliy hamkorlarni topish, muzokaralar tashkil etish va loyihalarni amalga oshirishda yordam beriladi.

Tarmoqlar bo‘yicha hamkorlik masalalarini tizimli ravishda ishlab chiqish uchun ikki mamlakat vazir o‘rinbosarlari rahbarligida ishchi guruh tuzilgan. Uning faoliyati aniq loyihalar, kompaniyalar va amaliy yechimlarga qaratiladi. Asosiy tashabbuslar va keyingi qadamlarni yagona Yo‘l xaritasiga birlashtirish orqali belgilangan chora-tadbirlarning muvofiqlashtirilgan holda bajarilishini ta’minlash rejalashtirilmoqda.

Biznes vakillari o‘rtasidagi hamkorlikning dastlabki natijalari ham alohida qayd etildi: kompaniyalar o‘rtasida savdo va investitsiya sohalarida kelishuvlarga erishilgan. Endilikdagi asosiy vazifa — ularni shartnomalar, mahsulot yetkazib berish va investitsiya qarorlariga aylantirish orqali hamkorlik ko‘lamini izchil kengaytirishdan iborat.

Forumning ishbilarmonlik dasturi B2B va B2G uchrashuvlari bilan davom etdi. Muzokaralarda aniq mahsulot va loyihalar, salohiyatli hamkorlarni topish hamda keyingi qadamlarni kelishib olish masalalari diqqat markazida bo‘ldi.