O‘zbekiston Respublikasi Investitsiyalar, sanoat va savdo vazirligi

Investitsiyalar, sanoat va savdo vazirligida Dengizga chiqish imkoniyati bo‘lmagan rivojlanayotgan mamlakatlar xalqaro tahliliy markazi ijrochi direktori Damdin-Od Dulguun bilan uchrashuv bo‘lib o‘tdi.

Tomonlar O‘zbekiston va Mo‘g‘uliston o‘rtasidagi savdo-iqtisodiy hamda transport-logistika hamkorligini yanada rivojlantirish istiqbollarini muhokama qildi. 2025-yil yakunlariga ko‘ra, o‘zaro tovar ayirboshlash hajmi 51,8 mln dollarni tashkil etdi. Joriy yilning may oyida ikki mamlakatning 70 dan ortiq kompaniyasi ishtirokida o‘tkazilgan biznes-forum natijalari qayd etildi.

Yuqori qo‘shilgan qiymatga ega mahsulotlar ishlab chiqarishni rivojlantirish, barqaror ta’minot zanjirlarini shakllantirish, yangi xalqaro transport yo‘nalishlarini ishlab chiqish, savdo tartib-taomillarini soddalashtirish va transchegaraviy jarayonlarni raqamlashtirish masalalariga alohida e’tibor qaratildi.

Xitoy–Qirg‘iziston–O‘zbekiston temir yo‘li loyihasining amalga oshirilishi Mo‘g‘ulistonning O‘zbekiston, Markaziy Osiyoning boshqa mamlakatlari va Janubiy Kavkaz bilan intermodal transport aloqalarini rivojlantirish uchun qo‘shimcha imkoniyatlar yaratishi ta’kidlandi.

Uchrashuv yakunida joriy yilning oktabr oyida Ulan-Batorda bo‘lib o‘tadigan CARECning 25-vazirlar konferensiyasiga tayyorgarlik ko‘rish va uni o‘tkazish doirasida hamkorlik qilish bo‘yicha kelishuvga erishildi.