O‘zbekiston Respublikasi Investitsiyalar, sanoat va savdo vazirligi

22-avgust kuni Toshkent shahrida O‘zbekiston va Ozarbayjon hududlarining IV forumi bo‘lib o‘tdi. Tadbirda O‘zbekiston Respublikasi investitsiyalar, sanoat va savdo vaziri Laziz Kudratov, Ozarbayjon Respublikasi iqtisodiyot vaziri Mikayil Jabbarov, ikki mamlakat hududlari, tegishli idoralar, rivojlanish institutlari va ishbilarmon doiralari rahbarlari ishtirok etdi. Forum turli sohalarni ifodalovchi 420 ga yaqin kompaniyani birlashtirdi.

Qayd etilganidek, ikki davlat rahbarlarining siyosiy irodasi va o‘zaro ishonchga asoslangan munosabatlari tufayli O‘zbekiston-Ozarbayjon strategik sherikligi izchil ravishda aniq iqtisodiy mazmun bilan boyib bormoqda. Forumning Ozarbayjon Respublikasi Prezidenti Ilhom Aliyevning O‘zbekistonga davlat tashrifi arafasida o‘tkazilgani uning ishiga alohida ahamiyat bag‘ishladi.

So‘nggi o‘n yil ichida ikki mamlakat o‘rtasidagi tovar ayirboshlash hajmi 26 barobar oshdi. 2025-yil yakunlariga ko‘ra, uning hajmi 795 mln dollarni tashkil etdi. Bugungi kunda O‘zbekistonda Ozarbayjon kapitali ishtirokidagi qariyb 260 ta korxona, Ozarbayjonda esa O‘zbekiston kapitali ishtirokidagi 130 dan ortiq korxona faoliyat yuritmoqda. Investitsiyaviy va savdo loyihalari portfeli 10 mlrd dollardan oshdi.

Kelgusidagi o‘sishning asosiy zaxiralaridan biri sifatida hududlararo hamkorlik belgilandi. Forum arafasida O‘zbekiston viloyatlari rahbarlari Ozarbayjonga tashrif buyurib, hududlar va biznes vakillari bilan muzokaralar o‘tkazdi hamda yangi tashabbuslarni ishlab chiqdi. Asosiy vazifa - ikki mamlakat hududlarining ishlab chiqarish imkoniyatlari, investitsiya maydonchalari va tadbirkorlik salohiyatini o‘zaro bog‘lash.

Ustuvor yo‘nalishlar qatorida sanoat va xomashyoni chuqur qayta ishlash, agrosanoat majmuasi, to‘qimachilik, turizm va development, savdo va logistika belgilandi. Sanoatda asosiy e’tibor xomashyoni qazib olish va qayta ishlashdan tortib tayyor mahsulot ishlab chiqarishgacha bo‘lgan to‘liq qo‘shilgan qiymat zanjirlarini shakllantirish, shuningdek, mahalliylashtirish va yangi ishlab chiqarish quvvatlarini yaratishga qaratildi.

Agrosanoat sohasidagi istiqbollar bog‘dorchilik, qishloq xo‘jaligi mahsulotlarini chuqur qayta ishlash, oziq-ovqat mahsulotlari ishlab chiqarish va zamonaviy sovutish infratuzilmasini rivojlantirish bilan bog‘liq. Ushbu yo‘nalishning mantiqiy davomi sifatida to‘qimachilik sanoatida ham ishlab chiqarish aloqalarini kengaytirish ko‘zda tutilmoqda. Bunda Ozarbayjonning transport-logistika imkoniyatlari va O‘rta yo‘lak salohiyatidan foydalanib, mahsulotlarning Yevropa bozorlariga yanada samarali chiqishini ta’minlash rejalashtirilgan.

Turizm va development ham istiqbolli yo‘nalishlardan biri sifatida qayd etildi. Amalga oshirilayotgan mehmonxona, turizm va shaharsozlik loyihalari yangi sayyohlik yo‘nalishlari, kurort infratuzilmasini yaratish hamda hududlarni kompleks rivojlantirish uchun asos bo‘lib xizmat qilmoqda.

Forumning amaliy qismi B2B va G2B formatidagi uchrashuvlar bilan davom etdi. Ularda hududlar, idoralar va biznes vakillari aniq takliflar hamda ularni amalga oshirish bo‘yicha keyingi qadamlarni muhokama qildi. Tadbir yakunida 2026-2027-yillarga mo‘ljallangan qo‘shma harakatlar rejalarini shakllantirish taklif etildi, ikki tomonlama hujjatlar almashinuvi esa erishilgan kelishuvlarni mustahkamladi.