O‘zbekiston Respublikasi Investitsiyalar, sanoat va savdo vazirligi

Italiyaning Prato shahrida delegatsiya Alba Tessile, T.I.S. Textile Innovation Sustainability kompaniyalari hamda tekstil mahsulotlarini tarqatish va chakana savdosi bilan shug‘ullanadigan italyan agentlari bilan B2B uchrashuvlar o‘tkazdi.

Shu bilan birga, Martina Franka shahrida shahar meri Janfranko Palmizano bilan uchrashuv bo‘lib o‘tdi. Uchrashuvda Rossorame, Ametlab, ItalTex, Sartoria La Torre va SI Group kabi mahalliy kompaniyalar bilan tekstil mahsulotlarini sorsing qilish bo‘yicha hamkorlik masalalari muhokama qilindi.

Biznes-missiya doirasida Germaniyada maxsus kiyimlar ishlab chiqarishga ixtisoslashgan Weitblick kompaniyasi bilan muzokaralar o‘tkazildi. Kompaniya O‘zbekistonda buyurtmalar joylashtirish va o‘z ishlab chiqarish quvvatlarini mamlakatimizga ko‘chirish niyatida ekanligini ma'lum qildi.

Shuningdek, TB International kompaniyasi vakillari bilan uchrashuv bo‘lib o‘tdi. Ushbu kompaniya 15 dan ortiq brendlarni, jumladan Urban Classics, Mister Tee, Flexfit Yupoong, Build your Brand va Merchcodeni birlashtiradi. Kompaniya vakillari O‘zbekistonda soursing asosida buyurtmalarni kengaytirishga tayyor ekanliklarini tasdiqlashdi. Muzokaralar davomida logistika masalalari va Zalando kabi Germaniya marketing platformalariga chiqish masalalari ham muhokama qilindi.

Ispaniyada, O‘zbekiston delegatsiyasi El Corte Inglés, Gedepsa va ACIR Southern Europe kabi yirik kompaniya va chakana savdo tarmoqlari bilan samarali uchrashuvlar o‘tkazdi. Muzokaralarda o‘zbek mahsulotlarining Ispaniya bozorida raqobatbardoshligini oshirish, logistika barqarorligini ta’minlash va mahsulotlarni Yevropa Ittifoqi talablariga moslashtirish masalalari asosiy e’tiborda bo‘ldi.

El Corte Inglés kompaniyasining global xaridlar bo‘limi vakili bilan bo‘lib o‘tgan muzokaralarda, o‘zbek korxonalari uchun ushbu tarmoq do‘konlarida mahsulot sotish uchun joy ajratish va Énfasis, Dustin, Sfera kabi brendlar uchun buyurtmalarni joylashtirish imkoniyatlari ko‘rib chiqildi.

Tendam kompaniyasi vakillari bilan o‘tkazilgan muzokaralarda o‘zbek mahsulotlarini Yevropa Ittifoqiga eksport qilish uchun narx belgilash va sertifikatlash masalalari muhokama qilindi. Yevropa tomoni Ispaniya va Lotin Amerikasi bozorlariga mahsulotlarni uzluksiz yetkazib berish bo‘yicha hamkorlikka tayyor ekanligini ma'lum qildi.

Polshada delegatsiya PPH „LEGS” kompaniyasi va 100 dan ortiq milliy korxonalarni o‘z ichiga olgan Polsha tekstilchilar uyushmasi bilan uchrashuvlar o‘tkazdi. Shuningdek, PPHU JOLA-STYL va Colorinvest, Arlen Textile Group kabi polshalik tekstilchilar bilan B2B muzokaralar bo‘lib o‘tdi.

Polsha-Osiyo Savdo palatasi prezidenti Yanush Pexochinski O‘zbekistonga biznes-missiya tashkil qilish, mahalliy tekstil ishlab chiqaruvchilar bilan ko'rishish va hamkorlar topish istagini bildirdi.

Umuman olganda, O‘zbekiston delegatsiyasining tashrifi Yevropa ishbilarmon doiralarining ochiq va o‘zaro manfaatli hamkorlik o‘rnatishga, hamda mavjud hamkorlik aloqalarini kengaytirishga katta qiziqishini ko‘rsatdi.