O‘zbekiston Respublikasi Investitsiyalar, sanoat va savdo vazirligi

17-iyul kuni O‘zbekiston Respublikasi investitsiyalar, sanoat va savdo vaziri o‘rinbosari Ilzat Kasimov Qashqadaryo viloyatida 60 nafardan ortiq tadbirkor va xorijiy investor ishtirokida ochiq muloqot o‘tkazdi.

Muhokamaning asosiy mavzulari investitsiya loyihalarini amalga oshirish, ishlab chiqarish quvvatlarini kengaytirish, eksportni rivojlantirish, moliyaviy resurslardan foydalanish imkoniyatlarini oshirish hamda muhandislik-kommunikatsiya infratuzilmasini takomillashtirish masalalariga bag‘ishlandi. Uchrashuv davomida qariyb 20 ta masala bevosita joyida hal etildi. Qolgan murojaatlar bo‘yicha mas’ul ijrochilar va amalga oshirish muddatlari belgilandi hamda ularning ijrosi nazoratga olindi.

Xorijiy kapital ishtirokidagi loyihalarni qo‘llab-quvvatlash masalalariga alohida e’tibor qaratildi. 10 dan ortiq xorijiy kompaniya rahbarlari bilan investitsiya tashabbuslarini amalga oshirishning keyingi bosqichlari hamda yuzaga kelayotgan tashkiliy masalalarni bartaraf etish choralari muhokama qilindi.

Xizmat safari davomida Ilzat Kasimov “Qashqadaryo” erkin iqtisodiy zonasida amalga oshirilayotgan loyihalar bilan ham tanishdi. Jumladan, Sulton Tex Group, Wosune Food Ingredients Karshi, Sun-Hightech va Solar Nature korxonalariga tashrif buyurilib, yangi ishlab chiqarish quvvatlarini barpo etish, mahalliylashtirish, texnologik liniyalarni ishga tushirish hamda investitsiya loyihalarini yanada rivojlantirish masalalari ko‘rib chiqildi.

Hududlarda investitsiya loyihalarini qo‘llab-quvvatlash va tadbirkorlik tashabbuslarini rivojlantirish bo‘yicha tizimli ishlar izchil davom ettiriladi.