Oʻzbekiston va Xitoyning CSAT kompaniyasi kompleks investitsiya loyihalarini amalga oshirishni muhokama qildi
2026-07-10 21:30:00 / Yangiliklar
10-iyul kuni Investitsiyalar, sanoat va savdo vazirligida vazir oʻrinbosari Ilzat Kasimov Xitoyning China Science Assistance Technology Group Co., Ltd. (CSAT) kompaniyasi prezidenti Li Jinjje bilan uchrashuv oʻtkazdi.
CSAT raqamli boshqaruv tizimlarini ishlab chiqish, transchegaraviy logistika xablarini barpo etish, suv omborlari va gidrotexnika inshootlarini qurish, shuningdek, maxsus texnikalarni yetkazib berishga ixtisoslashgan. Kompaniya, shuningdek, shaharsozlik, yuqori texnologiyali sogʻliqni saqlash hamda kommunal infratuzilmani modernizatsiya qilish yoʻnalishlarida loyihalarni amalga oshiradi.
Muzokaralar davomida Oʻzbekiston hududlarida kompleks investitsiya loyihalarini amalga oshirish istiqbollari muhokama qilindi. Tomonlar shaharsozlikda modul sanoat texnologiyalarini qoʻllash, raqamli infratuzilmani rivojlantirish, hududiy tibbiyot muassasalarini modernizatsiya qilish hamda ichimlik suvi tozalash tizimlarini takomillashtirish masalalariga alohida eʼtibor qaratdilar.
Uchrashuv yakunida muhokama qilingan yoʻnalishlar boʻyicha qisqa muddatlarda aniq loyiha takliflarini tayyorlashga kelishib olindi.