O‘zbekiston Respublikasi Investitsiyalar, sanoat va savdo vazirligi

2026-yil 1-iyul kuni Tbilisi shahrida ikki mamlakat o‘rtasidagi savdo-iyqtisodiy, investitsiyaviy va sanoat aloqalarini yanada rivojlantirishga qaratilgan O‘zbekiston-Gruziya biznes-forumi bo‘lib o‘tdi. Ushbu tadbir O‘zbekiston va Gruziya davlat tuzilmalari, moliyaviy institutlari hamda ishbilarmon doiralari o‘rtasida ochiq muloqot uchun samarali maydonga aylandi.

Forum O‘zbekiston Respublikasi Prezidentining keyingi 23 yildagi Gruziyaga ilk rasmiy tashrifi arafasida o‘tkazilgani tadbirga alohida ahamiyat baxsh etdi hamda tomonlarning amaliy hamkorlikning yangi bosqichiga o‘tishga tayyorligini ko‘rsatdi.

Forumning ochilishida O‘zbekiston Respublikasi investitsiyalar, sanoat va savdo vaziri Laziz Kudratov hamda Gruziya iqtisodiyot va barqaror rivojlanish vaziri Mariam Kvrivishvili qutlov so‘zlari bilan chiqish qildilar.

Forumda ikki mamlakatning kompaniyalari, moliyaviy institutlari, erkin industrial zonalari, tarmoq uyushmalari va konsalting tashkilotlarining qariyb 300 nafar rahbarlari hamda vakillari ishtirok etdi. Gruziya ishbilarmon doiralari Poti Free Industrial Zone, Tbilisi Free Zone, Hualing Free Industrial Zone, TBC Bank, Bank of Georgia, PwC, Grant Thornton, Maersk, Aramex Georgia, Softgen, DataMind, GM Pharmaceuticals va Aversi-Rational, shuningdek logistika, energetika, qurilish, farmatsevtika, IT, turizm, mehmonxona biznesi, qishloq xo‘jaligi va oziq-ovqat sanoati sohalarida faoliyat yurituvchi kompaniyalar tomonidan namoyon etildi.

Tadbir davomida O‘zbekiston iqtisodiy rivojlanishining asosiy ko‘rsatkichlari taqdim etildi: 2017-yildan buyon mamlakat iqtisodiyoti ikki barobar o‘sdi, 2025-yilda esa YaIM o‘sishi 7,7 foizni tashkil etdi. Shuningdek, xorijiy investorlar ishonchining sezilarli darajada ortgani qayd etildi - agar 2017-yilda mamlakatda xorijiy kapital ishtirokidagi 4 mingga yaqin korxona faoliyat ko‘rsatgan bo‘lsa, bugungi kunda ularning soni 20 mingtaga yetdi.

O‘zbekiston-Gruziya savdo-iqtisodiy munosabatlarining ijobiy dinamikasiga alohida e’tibor qaratildi. 2025-yilda o‘zaro tovar ayirboshlash hajmi 268 million dollarni tashkil etdi, bunda tomonlarning umumiy maqsadi ushbu ko‘rsatkichni 1 milliard dollarga yetkazish, shu bilan birga oddiy savdo-sotiqdan sanoat kooperatsiyasi, investitsiyalar, qo‘shma ishlab chiqarish va uchinchi mamlakatlar bozorlariga chiqishga o‘tishdan iborat.

Ushbu kun tartibining davomi sifatida forum ishtirokchilari aniq sheriklikning yangi bosqichi uchun asos bo‘la oladigan asosiy yo‘nalishlarni ko‘rib chiqdilar. Markaziy bloklardan biri transport va logistika bo‘ldi, jumladan, O‘rta koridor salohiyatidan foydalanish hamda Gruziyaning O‘zbekiston uchun Qora dengiz va Yevropa bozorlariga tabiiy chiqish yo‘li sifatidagi o‘rni muhokama qilindi. Shu nuqtai nazardan, Poti erkin industrial zonasida savdo-logistika va ishlab chiqarish xabini tashkil etish loyihasiga alohida e’tibor qaratildi.

Ikki mamlakatning logistika bog‘liqligi sanoat kooperatsiyasi uchun to‘g‘ridan-to‘g‘ri istiqbollarni ochadi. Shu munosabat bilan 2027-yilgacha bo‘lgan Sanoat hamkorligi dasturi qabul qilinadi, u O‘zbekiston va Gruziya korxonalari o‘rtasida yangi ishlab chiqarish quvvatlarini, investitsiya loyihalarini va barqaror aloqalarni yo‘lga qo‘yish uchun amaliy yo‘l xaritasi bo‘lishi kerak.

Farmatsevtika va agrosanoat majmuasiga alohida e’tibor qaratildi. Gruziya kompaniyalariga O‘zbekistonda, jumladan, «Tashkent Pharma Park» innovatsion klasteri negizida ishlab chiqarish quvvatlarini joylashtirish va keyinchalik Markaziy Osiyo bozorlariga chiqish taklif etildi. Tomonlar yuqori qo‘shilgan qiymatga ega mahsulotlar ishlab chiqarish uchun O‘zbekistonning xomashyo bazasi va Gruziyaning vinochilik, oziq-ovqat mahsulotlarini qayta ishlash, brending hamda premium qadoqlash borasidagi tajribasini birlashtirish salohiyatini qayd etdilar.

Energetika, elektrotexnika sanoati va raqamli xizmatlar ham muhim yo‘nalishlar sifatida qayd etildi. IT-sohasida, ikki mamlakatning eksport o‘sishi ko‘rsatkichlari yaqinligini hisobga olgan holda, asosiy e’tibor fintex, elektron tijorat, sun’iy intellekt, BPO xizmatlari va savdo-logistika jarayonlarini raqamlashtirishga qaratildi.

Moliyaviy hamkorlik real sektorni qo‘llab-quvvatlash vositasi sifatida ko‘rib chiqildi. Muvaffaqiyatli misol tariqasida TBC Bank guruhining O‘zbekistondagi faoliyati qayd etildi, bu yerda TBC Bank Group va uning hamkorlari allaqachon 460 million dollardan ortiq investitsiya kiritgan. Kelgusida ushbu mexanizmlarni sanoat, eksport va infratuzilma loyihalarini qo‘llab-quvvatlashga yanada faol yo‘naltirish rejalashtirilgan.

Tomonlar turizm sohasida ham o‘zaro qiziqishning barqaror o‘sib borayotganini ta’kidladilar. Gruziyadan O‘zbekistonga sayyohlar oqimi 2019-yilga nisbatan 2,5 barobardan ortiq o‘sdi, O‘zbekiston fuqarolarining Gruziyaga sayohatlari soni esa 2025-yilda 50,2 foizga ko‘paydi. Bu Buyuk Ipak yo‘li, Kavkaz va Qora dengiz mintaqasini birlashtiruvchi yo‘nalishlarni rivojlantirish, shuningdek, mehmonxona biznesi, wellness-turizm va mehmondo‘stlik sohasi uchun kadrlar tayyorlashda birgalikda ishlash uchun istiqbollar ochadi.

Asosiy sessiya doirasida, shuningdek, Gruziya Savdo-sanoat palatasi prezidenti Georgiy Pertaya, O‘zbekiston Investitsiyalarni jalb etish agentligi direktori Roksana Nesor hamda Gruziya investitsiya tuzilmalari va O‘zbekiston biznesi vakillarining taqdimotlari bo‘lib o‘tdi.

Forum yakunlari bo‘yicha ikki tomonlama hujjatlarni imzolash marosimi bo‘lib o‘tdi. Bundan tashqari, aniq loyihalarni ishlab chiqish va o‘zaro manfaatli sheriklikni yanada rivojlantirishga qaratilgan B2B va G2B uchrashuvlari o‘tkazildi.