O‘zbekiston Respublikasi Investitsiyalar, sanoat va savdo vazirligi

16-iyun kuni V Toshkent xalqaro investitsiya forumi doirasida “CAEx Uzbekistan” ko‘rgazmalar markazining “Qo‘qon” zalida mamlakatning investitsiya salohiyatini rivojlantirishga bag‘ishlangan yirik iqtisodiy tadbir - “AQSH-O‘zbekiston biznes-forumi” bo‘lib o‘tdi. Rus va ingliz tillariga sinxron tarjima qilingan mazkur forum ikki mamlakat o‘rtasidagi savdo-iqtisodiy aloqalarni yangi bosqichga olib chiqish, strategik muhim tarmoqlarda investitsiyaviy hamkorlikni kengaytirish hamda yangi ish o‘rinlarini yaratishga qaratildi.

O‘zbekiston investitsiyalar, sanoat va savdo vaziri Laziz Qudratov o‘zining kirish so‘zida shunday fikr bildirdi:

“Bugun Toshkent xalqaro investitsiya forumida AQSHning 193 ta kompaniyasi ishtirok etayotgani - bu mutlaq rekord hamda mamlakatlarimiz o‘rtasidagi ikki tomonlama munosabatlar tarixidagi eng yirik Amerika biznes delegatsiyasidir. Bu Amerika biznesi O‘zbekistonni nafaqat bozor, balki uzoq muddatli sarmoyaviy hamkor sifatida ko‘rayotganining ishorasidir”.

Kun tartibiga ko‘ra, muloqot “Innovatsiyalar, investitsiyalar va ish o‘rinlari: O‘zbekiston-AQSH hamkorligining yangi imkoniyatlari” mavzusidagi yuqori darajali panel sessiyasi va “Fireside Chat” formatidagi muhokama bilan boshlandi. O‘zbekiston Respublikasi Hukumati, AQSHning yetakchi moliya agentliklari hamda yirik Amerika biznesi vakillari o‘rtasida konstruktiv va amaliy muloqot o‘rnatildi.

O‘z nutqi davomida AQSH Xalqaro taraqqiyot moliya korporatsiyasi (DFC) bosh direktori Ben Blek quyidagilarni ta’kidlab oʻtdi:

“Markaziy Osiyo - 100 milliondan ortiq aholiga ega jadal rivojlanayotgan mintaqadir. Biz mintaqaning ulkan salohiyatini ko‘rib turibmiz va AQSh u bilan faol hamda uzoq muddatli hamkorlikka tayyor ”.

AQSH Eksport-import banki (EXIM) prezidenti va raisi Jon Yovanovich bankning ishtiroki sheriklikning moliyaviy-ekspertlik komponentini kuchaytirishi hamda Amerika texnologiyalari, uskunalari va xizmatlarini O‘zbekiston xususiy sektoriga yanada faol joriy etishga xizmat qilishi haqida gapirdi. U mamlakatlar o‘rtasidagi hamkorlikni mustahkamlash uchun noyob imkoniyat sifatida ayni hozirgi paytning muhimligini ta’kidlab, Toshkent investitsiya forumida Amerika kompaniyalari ishtirokining katta ko‘lamiga e’tibor qaratdi.

Forum dasturining yana bir muhim qismi sifatida "Muhim foydali qazilmalar va ilg‘or texnologiyalar: kelajak sanoat taraqqiyotining poydevori" mavzusiga bag‘ishlangan maxsus panel muhokamalari tashkil etildi. Sessiya davomida texnologiyalar, moliyaviy xizmatlar, qishloq xo‘jaligi mashinasozligi va aviatsiya sohasidagi global korporatsiyalar rahbarlari O‘zbekiston bozorida istiqbolli loyihalar, texnologik yechimlarni joriy etish va uzoq muddatli sanoat rivojlanishi masalalari bo‘yicha fikr almashdilar.

FLSmidth katta vitse-prezidenti Piter Flanagan tog‘-kon sanoati O‘zbekistonning iqtisodiy rivojlanishi, xalqaro hamkorligi va milliy farovonligini ta’minlashning asosiy yo‘nalishlaridan biri ekanligini ta’kidladi. Shuningdek, u mamlakatni modernizatsiya qilish va industrial rivojlantirishning jadal sur’atlari, jumladan, OKMKda MOF-3 mis boyitish majmuasining ishga tushirilishi misolida yangi imkoniyatlar yaratayotganiga va butun dunyodan xalqaro hamkorlarni jalb qilayotganiga urgʻu berdi.

Forum doirasida sanoat, neft-gaz sohasi, moliya, aviatsiya, geologiya-qidiruv, sun’iy yo‘ldosh aloqasi hamda raqamli infratuzilmani rivojlantirish yo‘nalishlarida hujjatlar imzolandi.