O‘zbekiston Respublikasi Investitsiyalar, sanoat va savdo vazirligi

Toshkent yirik investitsiya sammitiga mezbonlik qiladi: 42 trillion dollarlik aktivga ega global kompaniyalar beshinchi xalqaro forumga yigʻilmoqda.

Oʻzbekiston poytaxti uch kun davomida dunyoning yetakchi davlat va hukumat rahbarlari, transmilliy korporatsiyalar hamda nufuzli moliya institutlari rahbarlarini oʻz bagʻriga chorlaydi. Bu yilgi nufuzli anjuman «Investitsiyalar barqarorligi: yeni ufqlar, yangi sheriklik» shiori ostida tashkil etilmoqda.

TOSHKENT, 2026-yil 12-iyun - Shu yilning 16–18-iyun kunlari Toshkent shahrida beshinchi, yubiley Toshkent xalqaro investitsiya forumi (TXIF) boʻlib oʻtadi. Ushbu tadbir oʻtgan besh yil ichida shunchaki muloqot maydonidan chiqib, Markaziy Osiyo mintaqasining investitsiyaviy jozibadorligini belgilaydigan eng muhim mezonlardan biriga aylandi. Forumning rasмий ochilishiga qadar roʻyxatdan oʻtgan ishtirokchilar soni 8 316 nafardan oshib, bu borada mutloq rekord oʻrnatildi. Anjumanda ishtirok etish uchun dunyoning 100 ta mamlakatidan 3 423 nafar xorijiy delegat poytaxtimizga tashrif buyurmoqda.

Forumning bosh gʻoyasi: investitsiyalar barqarorligi - yuksak ishonch omili

2026-yilgi forum uchun tanlangan bosh shior hozirgi geosiyosiy oʻzgarishlar va taʼminot zanjirlaridagi uzilishlar davrida global kapitalning barqarorlik hamda istiqbolni aniq koʻra olishga boʻlgan ehtiyojini toʻla ifodalaydi. Forum dasturi uchta asosiy oʻlchov atrofida qurilgan boʻlib, birinchidan, yangi ufqlar yoʻnalishida geologiya, muhim xomashyo resurslari, «yashil» energetika va sunʼiy intellekt bozorlariga kirish koʻzda tutilgan. Ikkinchidan, yangi sheriklik doirasida mintaqaviy ittifoqlar tuzish hamda Fors koʻrfazi, Osiyo va Yevropaning yirik suveren jamgʻarmalari kapitalini jalb qilishga urgʻu beriladi. Uchinchidan, barqaror muhit oʻlchovi orqali Oʻzbekistonni uzoq muddatli investitsiyalar maskaniga aylantirayotgan institutsional islohotlar, qonun ustuvorligi va huquqiy va iqtisodiy muhitning daxlsizligi namoyish etiladi.

Kompaniyalarning koʻlami va nufuzi

TXIF-2026 anjumanining bosh farqi unda misli koʻrilmagan darajada yirik biznes namoyandalarining toʻplanganidir. Forum ishtirokchisi boʻlgan kompaniyalarning umumiy aktivlari 42 trillion dollarni tashkil etadi, bu esa jahon yalpi ichki mahsulotining qariyb 38 foiziga teng demakdir. Ushbu salmoqli raqamlar ortida yangi ishlab chiqarish quvvatlarini ishga tushirish va yirik investitsiya oqimlarini yoʻnaltirish boʻyicha yakuniy qaror qabul qiluvchi shaxslar turibdi. Toshkentga jahon iqtisodiyotining yetakchi tarmoqlari rivojini belgilab beruvchi 37 ta davlat yirik korporatsiyalarining rahbarlari kelmoqda.

Moliya va kapital sohasida BlackRock, JPMorgan Chase, Citibank, Visa, Franklin Templeton, Standard Chartered, Société Générale, Rothschild & Co, London Stock Exchange Group, Bank of China, Halyk Bank va TBC Bank kabi gigantlar vakillik qilmoqda. Energetika va resurslar yoʻnalishida Acwa, Masdar, BP, EDF, Air Liquide, Air Products, Petronas, SOCAR, Power China, Mitsubishi Heavy Industries hamda Sojitz korporatsiyalari yetakchilik qilmoqda. Sanoat va mashinasozlik tarmoqlaridan John Deere, CNH Industrial, Kawasaki Heavy Industries, XCMG, JAC Motors, Škoda Group, Airbus, Larsen & Toubro hamda Elsewedy Electric rahbarlari tashrif buyurmoqda. Logistika va infratuzilma tizimini DP World, AD Ports Group, CMA CGM, Groupe ADP, SUEZ va Veolia kompaniyalari taqdim etadi. Texnologiyalar, isteʼmol sektori va xizmat koʻrsatish sohasida Meta, VEON, Datavolt, Coca-Cola, Philip Morris International, Ajinomoto, Boston Consulting Group, Alvarez & Marsal, White & Case hamda Cleveland Clinic faol ishtirok etmoqda. Suveren kapital va xoldinglar yoʻnalishida esa PASHA Holding, ADQ, Oman Investment Authority, Sirius International Holding, NEQSOL Holding, Çalık Holding, Indorama hamda Orascom Investment Holding jamgʻarmalari jam boʻlgan.

Umuman olganda, real sektordan 2 780 nafardan ziyod kompaniya rahbarlari qatnashmoqda, bu oʻtgan yilgiga nisbatan 1 115 nafarga koʻpdir. Aynan mana shu koʻrsatkichning oʻsishi mamlakatning investitsion jozibadorligi ortib borayotganini koʻrsatuvchi asosiy belgi hisoblanadi.

Siyosiy doiralar va xalqaro institutlar ishtiroki

Nufuzli ishbilarmonlar tashrifi forumning yuqori siyosiy maqomi hamda davlatlar darajasidagi keng miqyosli ishtiroki bilan hamohangdir. Oʻtgan yili forumda 26 ta hukumat delegatsiyasi qatnashgan boʻlsa, bu yil ularning soni 62 taga yetdi. Ochilish marosimida Rossiya, Albaniya, Ozarbayjon, Belarus, Qozogʻiston, Qirgʻiziston va Tojikiston davlat hamda hukumat rahbarlaridan iborat yetti nafar oliy maqomli mehmon maʼruzachi sifatida ishtirok etadi.

Yirik xalqaro moliya institutlari birinchi rahbarlarining tashrifi forum nufuzini yanada oshirmoqda. Ular orasida YTTB prezidenti Odil Reno-Basso, BRIKS Yangi taraqqiyot banki prezidenti Dilma Russeff, Yevropa investitsiya banki vitse-prezidenti Marek Morya, shuningdek, Osiyo taraqqiyot banki, Jahon banki, Osiyo infratuzilmaviy investitsiyalar banki, Yevroosiyo taraqqiyot banki, JICA va OPEK jamgʻarmasi rahbarlari bor. Forum ishiga xalqaro moliya tashkilotlari va tijorat banklarining jami 372 nafar vakili jalb etilgan.

Amaliy muloqotlar koʻlami: dastur ikki barobardan ziyod kengaydi

Forumning haqiqiy qiymati mehmonlar soni bilan emas, balki undagi amaliy ishlarning koʻlami va mazmuni bilan oʻlchanadi. Bu yilgi dastur doirasidagi tadbirlar soni 36 tadan 79 taga koʻpaytirildi. Ishtirokchilarni 34 ta panel munozarasi, 8 ta investitsion pitch-sessiya, AQSH, Xitoy, Koreya Respublikasi, Turkiya, Ozarbayjon, Saudiya Arabistoni va BAA bilan oʻtkaziladigan 7 ta yirik ikki tomonlama biznes-forum, davra suhbatlari hamda oʻnlab qoʻshimcha tadbirlar kutmoqda.

Muloqotlarda umumiy fikrlar emas, balki aniq yoʻnalishlar muhokama qilinadi. Ular sirasiga energiya oʻtishi va atom energetikasi, muhim minerallar, Markaziy yoʻlak imkoniyatlari, raqamli boshqaruv va sunʼiy intellekt, islom moliyasi, agrobiznes hamda oziq-ovqat xavfsizligi kiradi. Shu bilan birga, Xorijiy investorlar kengashining toʻrtinchi yalpi majlisi ham boʻlib oʻtadi va unda dunyoning 75 ta eng yirik kompaniyasi mamlakatimizdagi biznes muhitini yanada yaxshilash boʻyicha oʻz takliflarini oʻrtaga tashlaydi.

Dasturda Oʻzbekistonning investitsiyaviy salohiyati ikkinchi koʻrgazmasiga alohida oʻrin ajratilgan. Bu yerda mamlakat iqtisodiyotining bugungi qiyofasi va drayver tarmoqlari, xususan, geologiya, energetika, kimyo, mashinasozlik, yengil sanoat, elektrotexnika, IT va sunʼiy intellekt sohalari namoyish etiladi. Tashkilotchilar anʼanaviy eksponatlar koʻrsatishdan qochib, investorlar bilan toʻgʻridan-toʻgʻri muloqot qilish imkonini beruvchi interaktiv formatlarga asosiy urgʻu berishmoqda.

Sport diplomatiyasi: norasmiy muhitdagi oliy darajadagi muloqot

Forum tarixida ilk bor ishbilarmonlik dasturi bir qator nufuzli sport tadbirlari bilan boyitildi. Bu yuqori darajadagi aloqalarni rasmiy majlis zallaridan tashqariga olib chiqish imkonini beradi. Yirik investorlar va xorijiy delegatlar norasmiy, ammo nufuzli muhitda, yaʼni yugurish yoʻlakchasi va tennis kortida uchrashadilar.

Shu maqsadda tashkil etilayotgan Silk Road Night Run tungi marafoni 16-iyun oqshomida «Yangi Oʻzbekiston» bogʻida boʻlib oʻtadi va unda xorijiy investorlar, mahalliy tadbirkorlar hamda davlat idoralari vakillari 3 va 10 kilometrlik masofalarga yugurishadi. Ushbu tadbir Xorijiy investorlar kengashi aʼzolari - Masdar, Çalık Enerji, Crowe, Acwa, Halyk Bank, The Coca-Cola Company, Datavolt, Orascom Investment Holding, Veolia va ODAS Enerji kompaniyalari koʻmagida oʻtkazilmoqda va forum ishtirokchilari uchun qatnashish mutloq bepul. Bundan tashqari, 15-iyun kuni Olimpiya shaharchasida Acwa homiyligida TIIF Open yirik tennis turniri boʻlib oʻtadi. Kortda Rothschild & Co, BlackRock, International Hospitals Group, Nordic Star Law Offices kabi xalqaro kompaniyalar vakillari hamda Oʻzbekiston biznes olami rahbarlari erkaklar oʻrtasida yakkalik va juftlik formatida kuch sinashadilar.

Global ommaviy axborot vositalarining diqqat markazida

Yirik kapital, siyosat va moliya institutlarining bir joyga toʻplanishi jahon matbuotining ham katta eʼtiborini tortmoqda. Forumni dunyoning 41 mamlakatidagi 123 ta tahririyatdan kelgan 209 nafar xorijiy jurnalist yoritib boradi. Bu oʻtgan yilgi koʻrsatkichdan qariyb ikki barobar koʻpdir. Mahalliy yetakchi OAVlar bilan bir qatorda, tadbir Bloomberg, Reuters, Nikkei, Euronews, BBC News, CGTN, TRT, The Independent va Xinxua kabi nufuzli agentliklar tomonidan yoritiladi.

Amaliy natijalar

Forum doirasida oʻn milliardlab dollarlik yirik investitsiyaviy bitimlar va shartnomalar imzolanishi kutilmoqda.

Garchi forum bor-yoʻgʻi uch kun davom etsa-da, Toshkentda qabul qilingan qarorlarning iqtisodiy samarasi uzoq yillar davomida sezilib turadi. TXIF-2026 iqtisodiyotimizning investitsiyaviy yetukligi uchun oʻziga xos jiddiy imtihon boʻlib, Oʻzbekiston ushbu sinovga rekord darajadagi yuksak koʻrsatkichlar bilan kirib bormoqda.

Toshkent xalqaro investitsiya forumi 2022-yildan buyon Oʻzbekiston Respublikasi Investitsiyalar, sanoat va savdo vazirligi tomonidan oʻtkazib kelinmoqda va Markaziy Osiyodagi eng yirik investitsiya maydoni hisoblanadi. Tadbir poytaxtdagi CAEx koʻrgazmalar markazi hamda Congress Hall Tashkent Cityda boʻlib oʻtadi.