O‘zbekiston Respublikasi Investitsiyalar, sanoat va savdo vazirligi

Bishkek shahrida ShHTga aʼzo davlatlar sanoat vazirlarining IV yigʻilishi doirasida birinchi "Ala-Too Trade & Industry Expo 2026" xalqaro koʻrgazmasida "Made in Uzbekistan" milliy stendining tantanali ochilish marosimi boʻlib oʻtdi.

Tadbirda Qirgʻiz Respublikasi Vazirlar Mahkamasi Raisi - Prezident Administratsiyasi Rahbari Adilbek Kasimaliyev, Oʻzbekiston Respublikasi Investitsiyalar, sanoat va savdo vaziri Laziz Kudratov, Qirgʻiz Respublikasi Iqtisodiyot va tijorat vaziri Bakit Sidikov, shuningdek, davlat organlari hamda ishbilarmon doiralar vakillari ishtirok etdilar.

Marosim davomida ISSV rahbari Laziz Kudratov mehmonlarni mamlakatimizning sanoat, investitsiyaviy va innovatsion salohiyati, shuningdek, mahalliy korxonalarning bugungi kunda erishayotgan yutuqlari bilan yaqindan tanishtirdi.

Ekspozitsiyada respublikamiz texnologik rivojlanishining beshta asosiy yoʻnalishi, yaʼni elektrotexnika tarmogʻi, qurilish materiallari ishlab chiqarish, avtomobilsozlik va kimyo sanoati, qolaversa, "IT Park Uzbekistan"ning keng imkoniyatlari namoyish etildi. Koʻrgazmaga qoʻyilgan mahsulotlar ishtirokchilarda katta qiziqish uygʻotdi.

Oʻzbekiston Respublikasi Investitsiyalar, sanoat va savdo vazirligi milliy brendlarni xalqaro maydonda faol ilgari surish va sanoat kooperatsiyasini yanada rivojlantirish borasidagi tizimli ishlarni izchil davom ettirmoqda.