O‘zbekiston Respublikasi Investitsiyalar, sanoat va savdo vazirligi

O‘zbekiston Respublikasi Prezidentining 2026 yil 30 martdagi PF-48-son «Toshkent xalqaro moliya markazini tashkil etish to‘g‘risida»gi Farmonini ijro etish maqsadida O‘zbekiston Respublikasi Investitsiyalar, sanoat va savdo vazirligi «Toshkent xalqaro moliya markazi (TXMM) to‘g‘risida»gi Konstitutsiyaviy qonun loyihasini jamoatchilik muhokamasi uchun e’lon qiladi.

Mazkur hujjat yetakchi xalqaro mutaxassislar va hamkor tashkilotlar bilan hamkorlikda tayyorlangan. Konstitutsiyaviy qonun loyihasi TXMM faoliyatining huquqiy asoslarini belgilaydi. Unga ko‘ra, TXMM O‘zbekiston hududida maxsus huquqiy rejim joriy etiladigan hudud hisoblanadi. Unda Angliya umumiy huquqi va adolat tamoyillari qo‘llaniladi, mustaqil xalqaro tijorat sudi (birinchi instansiya va apellyatsiya) hamda Toshkent xalqaro arbitraj markazi (TXAM) doirasida xalqaro miqyosda tan olingan arbitraj mexanizmlari faoliyat yuritadi.

Qonun loyihasining asosiy qoidalari:

▸ TXMMning huquqiy maqomi, boshqaruv tuzilmasi va hududiy chegaralari
▸ Markaz hududida Angliya umumiy huquqi va adolat tamoyillarining qo‘llanilishi
▸ Toshkent xalqaro tijorat sudi faoliyatining asoslari (birinchi instansiya va apellyatsiya)
▸ Moliyaviy institutlarni, shu jumladan bank, sug‘urta, islomiy va yashil moliya, raqamli (kripto) aktivlar hamda moliyaviy texnologiyalar sohasidagi tashkilotlarni ro‘yxatdan o‘tkazish va ular faoliyat yuritishining maxsus shartlari
▸ 2076 yil 1 yanvargacha TXMM hududida qo‘llaniladigan soliq imtiyozlari

Investorlar, yuristlar, moliyaviy institutlar, xalqaro tashkilotlar va tadbirkorlik jamoatchiligi vakillari loyiha bilan tanishib, o‘z izoh va takliflarini yuborishga taklif etiladi.

Ilova: Konstitutsiyaviy qonun loyihasi (xabarga ilova qilingan)

Taklif va mulohazalar uchun: tifc@miit.uz

Takliflar topshirish muddati: 2026 yil 10 aprel