O‘zbekiston Respublikasi Investitsiyalar, sanoat va savdo vazirligi

13-mart kuni O‘zbekiston Respublikasi investitsiyalar, sanoat va savdo vaziri Laziz Kudratov raisligida Turkiya Respublikasining 20 dan ortiq biznes vakillari ishtirokida davra suhbati bo‘lib o‘tdi.

Uchrashuvning asosiy maqsadi Turkiya investorlarining O‘zbekistondagi faoliyati jarayonida yuzaga kelayotgan masalalarni muhokama qilish hamda ularni tezkor bartaraf etish bo‘yicha amaliy yechimlarni ishlab chiqishdan iborat bo‘ldi.

Tadbirda Anadolu, Albayrak, Ziraat Bank, Cengiz, Çalık, Aksa, Eczacıbaşı Esan, OSTIM va Nobel kabi yirik turk kompaniyalari rahbarlari va vakillari ishtirok etdi.

Turk tomoni O‘zbekiston Respublikasi Prezidenti tomonidan investorlarga ko‘rsatilayotgan e’tiborni, shuningdek, investitsiya loyihalarini amalga oshirish jarayonida yuzaga keladigan masalalarni tezkor hal etish bo‘yicha olib borilayotgan ishlarni yuqori baholadi. Qayd etilishicha, davlat va biznes o‘rtasidagi bunday ochiq muloqot formati dunyoning faqat ayrim mamlakatlarida qo‘llaniladi.

Uchrashuv davomida turk kompaniyalarining amaliy faoliyati bilan bog‘liq qator masalalar, jumladan mahsulotlarni markirovkalash, debitor qarzdorlik, infratuzilma bilan ta’minlash hamda mehnat munosabatlarini tartibga solish masalalari muhokama qilindi. Har bir yo‘nalish bo‘yicha aniq choralar belgilandi.

Shuningdek, turk tadbirkorlari investitsiya muhitini yanada takomillashtirish bo‘yicha o‘z takliflarini bildirdi. Jumladan, bank-moliya sohasi, qurilish, energetika, kadrlar tayyorlash, farmatsevtika hamda sanoat zonalarini rivojlantirish masalalari yuzasidan fikr almashildi.

Uchrashuv yakunida ko‘tarilgan masalalarni tezkor hal etish bo‘yicha mas’ul shaxslar belgilandi hamda tegishli topshiriqlar berildi.

O‘zbekiston va Turkiya o‘rtasidagi savdo-iqtisodiy hamkorlik jadal rivojlanmoqda. So‘nggi besh yil davomida o‘zaro savdo hajmi 2020-yildagi 2,5 mlrd dollardan 3 mlrd dollarga yetdi. Qo‘shma korxonalar soni 3,5 barobarga oshib, 2020-yildagi 613 tadan 2 149 taga yetdi. Turkiya investitsiyalarini o‘zlashtirish hajmi 4,5 barobarga oshib, 2025-yilda 3,1 mlrd dollarni tashkil etdi. Ikki mamlakat o‘rtasida haftasiga qariyb 100 ta aviaqatnov amalga oshirilmoqda.

Hozirgi kunda energetika, geologiya, qurilish materiallari ishlab chiqarish, qishloq xo‘jaligi, sog‘liqni saqlash va boshqa sohalarda turk investitsiyalari ishtirokida umumiy qiymati qariyb 10 mlrd dollarga teng qator loyihalar amalga oshirilmoqda.