O‘zbekiston Respublikasi Investitsiyalar, sanoat va savdo vazirligida Prezident topshiriqlari ijrosi doirasida yosh xodimlar bilan uchrashuv o‘tkazildi
2026-02-27 19:10:00 / Yangiliklar
O‘zbekiston Respublikasi Prezidenti tomonidan yaqinda yoshlar bilan o‘tkazilgan muloqotda belgilab berilgan topshiriqlar ijrosini ta’minlash maqsadida Investitsiyalar, sanoat va savdo vazirligida yosh xodimlar bilan uchrashuv bo‘lib o‘tdi.
Muloqot markazida yosh mutaxassislarning kasbiy o‘sishi va salohiyatini to‘liq namoyon etishi uchun tizimli shart-sharoitlar yaratish masalasi turdi. Ta’lim imkoniyatlarini kengaytirish, uzluksiz o‘qish va malaka oshirishni qo‘llab-quvvatlash, xalqaro stajirovkalarni tashkil etish hamda ochiq va shaffof kadrlar zaxirasini shakllantirish tashabbuslariga alohida e’tibor qaratildi.
Shuningdek, murabbiylik institutini takomillashtirish, zamonaviy talablarga mos aniq va tushunarli karyera yo‘nalishlarini belgilash masalalari ko‘rib chiqildi. Jumladan, AKT bo‘yicha bilim va ko‘nikmalar, muzokara olib borish mahorati, loyiha boshqaruvi hamda boshqa zarur kompetensiyalarni rivojlantirish yuzasidan fikr almashildi. Yoshlar tashabbuslarini qo‘llab-quvvatlash hamda ularning vazirlik oldiga qo‘yilgan maqsad va vazifalarga erishish uchun salohiyatini to‘liq ro‘yobga chiqarishga xizmat qiladigan qulay muhit yaratish masalalari muhokama qilindi.
Uchrashuv yakunida yoshlarning islohotlar jarayonidagi rolini kuchaytirish hamda vazirlik faoliyati samaradorligini oshirish bo‘yicha aniq amaliy chora-tadbirlar belgilab olindi.