O‘zbekiston investitsiyalar, sanoat va savdo vaziri PASHA Real Estate bilan Toshkentdagi Ritz-Carlton loyihasini amalga oshirish masalalarini muhokama qildi
2026-02-11 21:05:00 / Yangiliklar
Joriy yilning 11-fevral kuni O‘zbekiston Respublikasi Investitsiyalar, sanoat va savdo vaziri Laziz Kudratov Ozarbayjonning PASHA Real Estate kompaniyasi xalqaro loyihalar rahbari Elchin Gadimov bilan uchrashuv o‘tkazdi.
Muzokaralar davomida Toshkent shahrida Ritz-Carlton brendi ostida besh yulduzli mehmonxona va turar-joy majmuasini barpo etish bo‘yicha investitsiya loyihasining amalga oshirilishi muhokama qilindi. Shuningdek, loyihani bosqichma-bosqich hayotga tatbiq etishning navbatdagi bosqichlari yuzasidan fikr almashildi.
Qurilish ishlariga 2024-yil avgust oyida start berilgan. Ayni paytda ishlar tasdiqlangan bosh reja asosida olib borilmoqda. Mehmonxona binosining uch qavatli yerosti qismi to‘liq yakunlandi, ikkinchi yerusti qavatini barpo etish ishlari davom etmoqda. “Shimoliy” minorada yerosti qismi yakunlanish arafasida, “G‘arbiy” minorada esa yerosti qavatlarini qurish ishlari boshlangan.
Uchrashuv yakunida loyihani belgilangan muddatlarda va yuqori sifat standartlari asosida amalga oshirish muhimligi qayd etildi.