O‘zbekiston Respublikasi Investitsiyalar, sanoat va savdo vazirligi

9-fevral kuni O‘zbekiston Respublikasi Investitsiyalar, sanoat va savdo vaziri Laziz Kudratov rahbarligida Markaziy Osiyo mamlakatlari bilan iqtisodiy faoliyat yuritayotgan tadbirkorlar bilan ochiq muloqot o‘tkazildi.

Tadbirda 30 dan ortiq biznes vakillari ishtirok etdi.

Uchrashuv davomida eksport hajmini oshirish, qo‘shma investitsiya loyihalarini amalga oshirish hamda o‘zbek kompaniyalarining Markaziy Osiyo bozorlaridagi ishtirokini kengaytirish masalalari muhokama qilindi.

Tadbirkorlar eksport jarayonida yuzaga kelayotgan bir qator amaliy masalalarni, jumladan, chegara o‘tkazish punktlaridagi tartib-taomillar, transport xarajatlarini optimallashtirish hamda eksportchilarni qo‘llab-quvvatlash mexanizmlarini takomillashtirish bilan bog‘liq masalalarni ko‘tardilar. Barqaror va uzluksiz yetkazib berishni ta’minlash maqsadida kelishilgan yechimlarni ishlab chiqish hamda mavjud ikki tomonlama mexanizmlardan samarali foydalanish zarurligi ta’kidlandi.

Biznes vakillari qo‘shni davlatlar hududida, avvalo yengil sanoat va qurilish materiallari ishlab chiqarish sohalarida qo‘shma korxonalar tashkil etishga tayyor ekanliklarini bildirib, moliyaviy instrumentlar va qo‘shma rivojlantirish jamg‘armalari imkoniyatlaridan foydalanish muhimligini qayd etdilar.

2025-yil yakunlariga ko‘ra, Markaziy Osiyo mamlakatlari bilan o‘zaro savdo aylanmasi 8 284,6 mln AQSh dollarini tashkil etdi (+15,2%).

Tadbirkorlar tomonidan ilgari surilgan har bir tashabbus bo‘yicha vazirlikning mas’ul xodimi biriktirilib, ularning o‘z vaqtida va sifatli amalga oshirilishi yuzasidan shaxsiy mas’uliyat yuklatildi.