O‘zbekiston Respublikasi Investitsiyalar, sanoat va savdo vazirligi

Iroq Respublikasiga amalga oshirilgan ishchi tashrif doirasida O‘zbekiston Respublikasi Investitsiyalar, sanoat va savdo vaziri o‘rinbosari Shoxrux Gulamov Iroqning asosiy davlat organlari va ishbilarmon doiralari rahbariyati bilan qator ikki tomonlama uchrashuvlar o‘tkazdi, shuningdek Bag‘dod shahrida bo‘lib o‘tgan O‘zbekiston–Iroq biznes-forumida ishtirok etdi.

Xususan, Iroq Sanoat va mineral resurslar vaziri o‘rinbosari Juma al-Bahadli, Savdo vazirining iqtisodiy masalalar bo‘yicha o‘rinbosari G‘assan Hamid, Iroq Milliy investitsiya komissiyasi raisi o‘rinbosari Salar Muhammad Amin, Iroq sanoatchilar uyushmasi rahbari Adil Akkab hamda Iroq Iqtisodiy kengashi raisi Ibrohim al-Bag‘dodiy bilan muzokaralar o‘tkazildi.

Uchrashuvlar davomida savdo-iqtisodiy hamkorlikni kengaytirish, savdo va tartibga soluvchi to‘siqlarni bartaraf etish, ustuvor o‘zbek mahsulotlari bo‘yicha tariflarni optimallashtirish, sertifikatlash tartib-taomillarini tezlashtirish hamda mintaqaviy transport xablaridan foydalanishni o‘z ichiga olgan logistika infratuzilmasini rivojlantirish masalalari muhokama qilindi. Qurilish materiallari, to‘qimachilik va gilam mahsulotlari, oziq-ovqat hamda zargarlik buyumlari eksportini kengaytirish, shuningdek o‘zbek kompaniyalarining Iroq bozoriga chiqish istiqbollari ko‘rib chiqildi.

O‘zbekistonning Iroqdagi elchixonasi va Iroq Iqtisodiy kengashi ko‘magida tashkil etilgan biznes-forumda so‘zga chiqqan Shoxrux Gulamov savdoning O‘zbekiston–Iroq iqtisodiy hamkorligini chuqurlashtirishdagi ustuvor ahamiyatini, shuningdek ikki tomonlama tovar ayirboshlashda sezilarli darajada foydalanilmayotgan salohiyat mavjudligini ta’kidladi. Sanoat va mineral resurslar sohasidagi hamkorlik masalalariga alohida e’tibor qaratilib, qo‘shma ishlab chiqarish loyihalarini amalga oshirish, qo‘shma korxonalar tashkil etish, mineral xomashyoni qayta ishlash, rafinirovka qilingan metallar, muhandislik xizmatlari va uskunalar yetkazib berish istiqbollari muhokama qilindi.

Ma'lumot uchun: Forumda Iroqning davlat organlari va ishbilarmon doiralari vakillaridan iborat 150 nafardan ortiq ishtirokchi, shuningdek oziq-ovqat, to‘qimachilik, farmatsevtika, elektrotexnika, mebelsozlik va qurilish materiallari ishlab chiqarish sohalarida faoliyat yuritayotgan 25 ta yetakchi kompaniya va tadbirkorlar qatnashdi. Tadbir davomida O‘zbekistonning investitsiyaviy jozibadorligi, sanoat va eksport salohiyati taqdim etildi, B2B uchrashuvlar o‘tkazildi hamda ishbilarmonlik aloqalarining amaliy samaradorligini oshirish maqsadida o‘zbek mahsulotlari ko‘rgazmasi tashkil etildi.

Tashrif yakunida Iroq tomoniga O‘zbekistonga tashrif buyurish hamda O‘zbekiston–Iroq Qo‘shma iqtisodiy qo‘mitasining birinchi yig‘ilishi va biznes-forumini o‘tkazish imkoniyatlarini ko‘rib chiqish taklif etildi.