O‘zbekiston Respublikasi Investitsiyalar, sanoat va savdo vazirligi

Joriy yilning 2-3-may kunlarida tashkil etilgan Toshkent xalqaro investitsiyalar forumida yurtimizning investitsion muhitini yaxshilash, iqtisodiy sohalarda yangiliklar hamda jahon tajribasini mamlakatimiz bo‘ylab tatbiq etish, xorijiy investor hamda biznesmenlar bilan yangi loyihalar ustida ish boshlash borasida qator natijalarga erishildi.

Forum doirasidagi “Kimyoviy ishlab chiqarishga investitsiyalar: yutuq sari yo‘l” panel sessiyasida O‘zbekiston kimyo sanoatining jadal o‘sishi strategiyalari va uning investitsiyaviy jozibadorligini oshirish borasida ana shunday yangiliklar hamda zarur choralar haqida so‘z bordi.

Sessiya moderatori IFC menejeri Lukas Keysi bo‘ldi. Tadbirda so‘zga chiqqan “Linde”ning Yevropa-Sharqiy mintaqasi prezidenti Matias Kranz O‘zbekistonning sohadagi yutuqlariga alohida to‘xtalib, forumning birinchi kunidanoq investitsiya kiritishga qaror qilganliklarini ma’lum qildi:

— O‘zbekistonga investitsiya kiritish bo‘yicha forumning ilk kunida bir qarorga keldik. Biz “Navoiy Azot” bilan qo‘shma korxona barpo qilib, bu orqali O‘zbekiston bozorlariga kirib bormoqchimiz. Bu loyihani amalga oshirish uchun mamlakat bozorida qanday sharoit va talablar borligini o‘rganib chiqdik. Qayd etish joiz, mamlakat katta muvaffaqiyatlarga erishgan. Aholi orasida yoshlar ko‘pchilikni tashkil qiladi, yoshlar bizni biznesimiz uchun juda muhim, — deydi u. — Bozor erkinligi bizga O‘zbekistonda bozor salohiyatini ko‘rsatib berdi. Endi biz hamkorlikni yo‘lga qo‘yishga to‘liq tayyormiz. Bu jarayonlar eksportga ham turtki bo‘ladi. Biz 145 yildan beri bozordamiz va boy tajribaga egamiz. Chiqindilarni kamaytirish bo‘yicha tajribamiz ham yetarlicha. Biz uchun muhim yo‘nalishlar O‘zbekiston uchun ham. Shuning uchun birga ishlamoqchimiz.

Mineral o‘g‘itlar va qazib olish tarmoqlari mahsulotlarini ishlab chiqarishga yo‘naltirilgan O‘zbekiston kimyo sanoati qishloq xo‘jaligining o‘sishi, ishlab chiqarish xavfsizligini ta’minlash hamda iqtisodiyotning asosiy tarmoqlarini rivojlantirish uchun sharoit yaratdi. Bu haqida “O‘zkimyosanoat” aksiyadorlik jamiyati boshqaruvi raisi o‘rinbosari Akbar Qurbonov:

— Chet el mamlakatlar bilan qator loyihalarimiz bor. Masalan, “Indorama” bilan 2018-yildan beri hamkorlik qilyapmiz. Ulardan biri, Qo‘qonda qurilgan mineral o‘g‘itlar ishlab chiqarish zavodi. Hozirda ushbu zavodda yiliga 1 million tonna o‘g‘it ishlab chiqarilmoqda. Bizda ijara narxi ham bozor narxlaridan ancha past va tadbirkorlarning texnik imkoniyatlaridan foydalanib ularga mos inshootlar yaratiladi. Biz xorijiy xususiy biznesni qo‘llab-quvvatlaymiz. Birgina “Navoiy Azot”ning o‘ziyoq o‘zi 90 ga yaqin, “O‘zkimyosanoat” tomonidan esa 190 ga yaqin mahsulot ishlab chiqariladi. “Navoiy Azot” xususiy korxonasi bilan hamkorlikda HBMC ishlab chiqdik. Barcha xomashyo O‘zbekistonda mavjud. Xususiy biznesga ko‘mak berish bizning asosiy maqsadlarimizdan biri.

Sessiyada hukumat va xususiy sektorning kimyoviy sanoatning yillik o‘sish sur’atlarini oshirish va sanoatning investitsion jozibadorligini yaxshilash borasidagi rejalari va strategiyalar taqdim etildi.

Ishtirokchilar yangi yuqori texnologiyali ishlab chiqarishlarni ishga tushirish, xorijiy kapital va ilg‘or texnologiyalarni jalb qilish uchun qulay shart-sharoitlar yaratish bo‘yicha ekspert takliflarini kiritishdi.

Sessiya iqtisodiyotning istiqbolli sektorini rivojlantirish bo‘yicha yo‘l xaritasini ishlab chiqish uchun davlat va biznes o‘rtasidagi muloqot maydon vazifasini bajardi.