O‘zbekiston Shanxayda bo‘lib o‘tayotgan 8-Xitoy Xalqaro Import Ko‘rgazmasida (CIIE) milliy pavilyonini namoyish qildi
2025-11-05 18:55:00 / Yangiliklar
2025-yil 5-noyabr kuni Xitoy Xalq Respublikasining Shanxay shahrida 8-Xitoy xalqaro import ko‘rgazmasi (CIIE) o‘z ishini boshladi. Tadbirda O‘zbekiston Respublikasi investitsiyalar, sanoat va savdo vaziri o‘rinbosari Ilzat Kasimov rahbarligidagi vazirlik va idoralar, shuningdek, tadbirkorlar delegatsiyasi ishtirok etmoqda.
O‘zbekiston Respublikasining milliy stendi tog‘-kon, qishloq xo‘jaligi, to‘qimachilik, ipakchilik, charm-poyabzal va kimyo sanoatiga oid korxonalar tomonidan Xitoy bozoriga faol eksport qilinayotgan 200ga yaqin turdagi mahsulotlar bilan namoyish etilmoqda. Ushbu ekspozitsiya O‘zbekistonning yuqori sanoat va eksport salohiyatini namoyon etib, mamlakatning tashqi iqtisodiy aloqalarni kengaytirish hamda Xitoy bilan hamkorlikni mustahkamlash yo‘nalishidagi strategiyasini aks ettiradi.
Ko‘rgazma doirasida forumlar, panel munozaralari, konferensiyalar va Xitoyning yetakchi kompaniyalari vakillari bilan uchrashuvlar o‘tkazilishi rejalashtirilgan. Ushbu tadbirlar sheriklik aloqalarini rivojlantirish, tajriba almashish va iqtisodiyotning ustuvor tarmoqlariga investitsiyalarni jalb etishga qaratilgan bo‘lib, O‘zbekiston va Xitoy o‘rtasidagi biznes aloqalarini yanada mustahkamlashga xizmat qiladi.