O‘zbekiston–Koreya sun’iy intellekt asosidagi ta’lim platformasini joriy etish masalalari muhokama qilindi
2026-02-19 17:00:00 / Vazirlik yangiliklar
O‘zbekiston–Koreya qurilish xavfsizligi yo‘nalishida sun’iy intellekt asosidagi ta’lim platformasini joriy etish masalalari muhokama qilindi
Bugun vazirlik huzuridagi Texnik me’yorlash va standartlashtirish ilmiy-tadqiqot instituti hamda Koreya Qurilish muhandisligi va texnologiyalari instituti (KICT) delegatsiyasi vakillari o‘rtasida “Sun’iy intellekt asosidagi O‘zbekiston–Koreya qurilish xavfsizligi ta’lim platformasi” loyihasini amalga oshirish masalalari muhokama qilindi.
Uchrashuvda qayd etilganidek, mazkur tashabbus qurilish sohasida xavfsizlikni ta’minlash tizimini sifat jihatidan yangi bosqichga olib chiqishga qaratilgan. Loyiha doirasida zamonaviy raqamli texnologiyalar va sun’iy intellekt yechimlarini joriy etish orqali quyidagi ustuvor yo‘nalishlarni amalga oshirish rejalashtirilmoqda:
• qurilish maydonlarida yuzaga kelishi mumkin bo‘lgan xavf-xatarlarni barvaqt aniqlash va prognoz qilish;
• xodimlarning bilim va amaliy ko‘nikmalarini raqamli tizim asosida baholash;
• interaktiv hamda masofaviy ta’lim mexanizmlarini joriy etish;
• qurilish sohasida xavfsizlik madaniyatini tizimli shakllantirish.
Tomonlar mazkur loyihani ikki davlat o‘rtasidagi innovatsion hamkorlikning muhim yo‘nalishi sifatida baholab, uning amaliy samaradorligini ta’minlash yuzasidan hamkorlikni yanada chuqurlashtirishga kelishib oldilar.
Qayd etilishicha, ushbu uchrashuv O‘zbekiston va Koreya Respublikasi o‘rtasida qurilish sohasida raqamli transformatsiya va xavfsizlikni ta’minlash yo‘nalishidagi strategik sheriklikni yangi bosqichga olib chiqishga xizmat qiladi.