Olmazor tumanida uy-joy kommunal sohasidagi o‘zgarishlar prokuratura nazoratida
2026-02-10 19:00:00 / Vazirlik yangiliklar
Bugun Bosh prokuror Nig‘matulla Yo‘ldoshev hamda bir qator boshqa mutasaddilar Toshkent shahri Olmazor tumanidagi “Olmazor holding grand” boshqaruv servis kompaniyasida bo'ldilar. Mehmonlarni vazir o‘rinbosari Ozoda Jo‘rayeva kutib olib, ko‘p kvartirali uy-joy fondini boshqarish va ekspluatatsiya qilish sohasida amalga oshirilayotgan islohotlar, ularning hozirgi holati va amaliy natijalari haqida batafsil ma’lumot berdi.
Jarayonda sohaga raqamlashtirishni joriy etish, murojaatlar bilan ishlash tizimini takomillashtirish, aholiga qo‘shimcha servis xizmatlar ko‘rsatish borasida erishilgan natijalar Olmazor tumani misolida ko‘rib chiqildi. Shuningdek, ichimlik va oqova suv tizimini yaxshilash, issiqlik ta’minoti barqarorligini ta’minlash hamda yo‘l infratuzilmasini rivojlantirish yuzasidan amalga oshirilayotgan ishlar bo‘yicha taqdimotlar o‘tkazildi.
Ma’lum qilinishicha, bugungi kunda Olmazor tumanida 46 mingdan ortiq xonadonni o‘z ichiga olgan 942 ta ko‘p kvartirali uy mavjud. Ularning 868 tasiga 9 ta boshqaruv servis kompaniyasi hamda 5 ta uy-joy mulkdorlari shirkati xizmat ko‘rsatib kelmoqda. Sohani tizimli tashkil etish, kommunal xizmatlar sifatini oshirish maqsadida oxirgi yillarda moddiy-texnika bazasi mustahkamlanib, ish o‘rinlari yaratildi.
Xususan, tumandagi boshqaruvchi tashkilotlar ixtiyorida 566 ta moddiy-texnika vositalari, turli xil avtotransport va maxsus texnikalar mavjud bo‘lib, sohada 476 nafardan ortiq ishchi-xodim doimiy faoliyat olib bormoqda.
Kuz-qish mavsumiga tayyorgarlik doirasida 2025-2026-yillar uchun 541 ta ko‘p kvartirali uy joriy ta’mirlanib, bu ishlarga 18 mlrd 947 mln so‘m mablag‘ yo‘naltirildi. Shu bilan birga, 2026-yilda tom qismlarini ta’mirlash, kirish yo‘laklarini yangilash, liftlarni almashtirish, domofonli eshiklar o‘rnatish va muhandislik kommunikatsiyalarini modernizatsiya qilish bo‘yicha aniq rejalar belgilangan.
Tashrif davomida Bosh prokurorga “Olmazor holding grand” BSK binosi, unda aholi va ishchi-xodimlar uchun yaratilgan zamonaviy shart-sharoitlar, 24/7 dispetcherlik xizmati, qo‘shimcha servis xizmatlar, tadbirkorlik faoliyati hamda moddiy-texnika baza imkoniyatlari yaqqol namoyish etildi.