O‘zbekiston Respublikasi Qurilish va uy-joy kommunal xo‘jaligi vazirligi

Ayni paytda poytaxtimizda joylashgan “O‘zekspomarkaz” majmuasida "Qurilish - UzBuild 2026" xalqaro ko‘rgazmasi o‘z ishini boshladi.

Tadbir avvalida so‘zga chiqqan O‘zbekiston Respublikasi Qurilish va uy-joy kommunal xo‘jaligi vaziri o‘rinbosari D.Adilov ko‘rgazmaning ahamiyatiga alohida to‘xtalib, so‘nggi yillarda mamlakatimizda qurilish va shaharsozlik sohasida amalga oshirilayotgan izchil islohotlar va xavfsizlik talablarini kuchaytirish masalalariga e’tibor qaratdi.

Xususan, vazir o‘rinbosari o‘z nutqida shunday dedi:

“Bugun “UzBuild” ko‘rgazmasi nafaqat mahsulot va texnologiyalar namoyishi, balki qurilish sohasida ochiq muloqot, tajriba almashish va yangi hamkorliklarni yo‘lga qo‘yish uchun muhim platformaga aylangan. Ushbu maydon orqali biz zamonaviy, sifatli va barqaror qurilish tamoyillarini amaliyotga keng joriy etishga intilamiz”.

Ta’kidlanganidek, ko‘rgazma doirasida energiya tejamkor materiallar, zamonaviy qurilish uskunalari, raqamli yechimlar hamda “yashil qurilish” tamoyillariga asoslangan loyihalar namoyish etilmoqda. Bu esa aholining qulay va xavfsiz uy-joy bilan ta’minlanishi, shuningdek, qurilish jarayonlarining samaradorligini oshirishga xizmat qiladi.

“Qurilish - UzBuild 2026” xalqaro ko‘rgazmasi bir necha kun davom etib, soha mutaxassislari uchun muzokaralar, taqdimotlar va amaliy uchrashuvlar maydoni bo‘lib xizmat qilishi kutilmoqda.