Fargʻonada noqonuniy qurilishlarga qarshi davlat arxitektura nazorati kuchaytirilmoqda
2026-02-05 16:30:00 / Vazirlik yangiliklar
Oʻzbekiston Respublikasi Vazirlar Mahkamasining 2025-yil 28-martdagi 192-sonli qarori ijrosini taʼminlash maqsadida Fargʻona viloyatida arxitektura va qurilish sohasida davlat nazorati chora-tadbirlari izchil ravishda kuchaytirilmoqda. Mazkur qaror qurilish jarayonlarida qonun ustuvorligini taʼminlash, shuningdek, davlat arxitektura nazoratini zamonaviy va raqamli mexanizmlar asosida takomillashtirishga qaratilgan.
Olib borilgan nazorat tadbirlari davomida Uchkoʻprik tumani "Bogʻiboʻston" MFY Mullazoyir koʻchasi 100-uy manzilida fuqaro B.B. tomonidan 2000 kv.m yer maydonida loyiha-smeta hujjatlarisiz, belgilangan tartib talablarini buzgan holda 7 ta ikki qavatli kottej tipidagi turar joy oʻzboshimchalik bilan qurib olingani aniqlandi.
Davlat arxitektura nazorati departamenti xodimlari tomonidan oʻtkazilgan monitoring natijalariga koʻra mazkur noqonuniy qurilish holati boʻyicha qonunchilikda belgilangan tartibda tegishli hujjatlar rasmiylashtirilib, huquqiy choralar koʻrish ishlari boshlandi.
Eslatma: Har qanday qurilish yoki qayta taʼmirlash ishlari faqat belgilangan tartibda tegishli ruxsatnomalar asosida amalga oshirilishi shart. Oʻzboshimchalik bilan olib borilgan qurilish ishlari qonunchilikka muvofiq javobgarlikka sabab boʻladi.