Surxondaryoda turar joylar va ijtimoiy obyektlar qurilishi ijrosi o‘rganildi
2026-02-02 18:00:00 / Vazirlik yangiliklar
Surxondaryo viloyatida aholini zamonaviy va zarur infratuzilmaga ega turar joylar bilan ta’minlashga qaratilgan loyihalar ijrosi o‘rganildi.
Qator mas’ullardan iborat ishchi guruh Termiz tumanida Surxon daryosi bo‘yida amalga oshirilayotgan “Seoul Man” loyihasi, shuningdek, 106 gektar maydonda barpo etilishi rejalashtirilgan “Termiz Eko shahar” kompleksining loyihalash ishlari bilan tanishdi. Xususan, Termiz shahri Katta bog‘ mahallasida qurilayotgan ko‘p qavatli turar joylar majmuasi holati ko‘zdan kechirildi.
O‘rganishlar davomida Oltinsoy tumanida ko‘p qavatli uylar, tadbirkorlik obyektlari, markaziy dehqon va oziq-ovqat bozori, “Taraqqiyot va yetakchilik maskani” dasturi doirasidagi ishlar hamda markaziy poliklinika binosini rekonstruksiya qilish jarayonlari ham tahlil qilindi.
Shu bilan birga, loyiha hujjatlarining amaldagi talab va me’yorlarga muvofiqligi, qurilish ishlarining sifati hamda ishchi kuchi bilan ta’minlanganlik holatiga alohida e’tibor qaratildi.
Ayrim obyektlarda ishlar sust olib borilayotgani qayd etilib, mas’ullarga qurilish jarayonlarini jadallashtirish, belgilangan muddatlarga qat’iy rioya qilish va sifat talablarini to‘liq ta’minlash yuzasidan aniq topshiriqlar berildi.