“Rahbar va yoshlar” uchrashuvi tashkil etildi
2026-01-30 19:00:00 / Vazirlik yangiliklar
Bugun Qurilish va uy-joy kommunal xo’jaligi vazirligi tomonidan Mirzo Ulug‘bek nomidagi Samarqand davlat arxitektura-qurilish universiteti talabalari uchun “Rahbar va yoshlar” uchrashuvi tashkil etildi.
Unda vazir o‘rinbosari Ozoda Jo‘rayeva ishtirok etib, qurilish va muhandislik yo‘nalishlarida ta’lim olayotgan talabalar bilan ochiq va samimiy suhbat o‘tkazdi.
“Men sizlarning timsolingizda kelajakdagi davlat arboblari, buyuk bunyodkorlar va yurtimiz ravnaqi uchun mas’ul bo‘ladigan yetuk mutaxassislarni ko‘ryapman. Davlatimiz rahbari ta’kidlaganidek, yoshlar — Yangi O‘zbekistonning eng katta boyligi va tayanchi. Bugun siz olayotgan bilim va tajriba ertaga zamonaviy shaharlar, mustahkam inshootlar va qulay yashash muhitiga aylanadi. Eng muhimi, o‘z kuchingizga ishoning, tashabbuskor bo‘ling va hech qachon izlanishdan to‘xtamang — vazirligimiz har bir g’oya, taklif va tashabbuslaringizni doim qo‘llab-quvvatlaydi,” — dedi Ozoda Jo‘rayeva.
Tadbirda ta’kidlanganidek, vazirlikning 2025-yilgi yoshlar bandligi dasturi doirasida ko‘p kvartirali uylarni boshqarish organlari va qurilish tashkilotlari bilan hamkorlikda 14 800 nafardan ortiq yoshlar kasbga o‘qitilib, ularning bandligi ta’minlandi. Shuningdek, xorijda ta’lim olayotgan yosh mutaxassislar bilan doimiy hamkorlik aloqalarini o‘rnatish, sport-targ‘ibot ishlari, yoshlarning jamiyatda munosib o‘rin egallashi va ularni qiynab kelayotgan muammolariga yechim berish borasida tizimli ishlar amalga oshirib kelinmoqda.
Joriy yil dastur doirasida yosh mutaxassislarni “Sotsial lift” tamoyili ostida lavozimda o‘stirish tizimi yo‘lga qo‘yiladi. “Ustoz-shogird” maktablari faoliyati davom ettirilib, sohaviy yo‘nalishlardagi oliy ta’lim muassasalariда tahsil olayotgan yoshlarni sohada amaliyot o‘tashi ta’minlanmoqda.