Ko‘p kvartirali uylarga xizmat ko‘rsatuvchi boshqaruv servis kompaniyalari — xalq xizmatida!
2026-01-23 10:00:00 / Vazirlik yangiliklar
Hududlarda aholi xavfsizligini ta’minlash, fuqarolarning kundalik qatnovini qulaylashtirish maqsadida keng ko‘lamli tozalash ishlari olib borilmoqda.
Xususan, Samarqand shahrining So'g‘diyona va Temiryo‘l vokzali atrofi hududlarida joylashgan ko‘p qavatli uylarga xizmat ko'rsatuvchi “So'g‘diyona-Samarqand” hamda “Samarqand Oltin Asr” boshqaruv servis kompaniyalari tomonidan qor tozalash ishlari amalga oshirilayapti. Yo‘laklar va kirish-chiqish hududlariga qum-tuz aralashmalari sepilib, ishchi xodimlar hamda maxsus qor tozalash texnikalari yordamida hududlar tozalanmoqda.
Shuningdek, qish mavsumida yuzaga kelishi mumkin bo‘lgan avariyaviy holatlarni tezkor bartaraf etish maqsadida tashkil etilgan 24 soat uzluksiz faoliyat yurituvchi dispetcherlik xizmatlari faoliyati, aholidan kelib tushayotgan murojaatlarning ijrosi, ko‘p qavatli uylar atrofi va yo‘laklarining tozaligi doimiy nazoratga olingan.
Boshqaruv servis kompaniyalarining moddiy-texnika bazasi hamda mavjud zahiralari Samarqand viloyati Qurilish va uy-joy kommunal xo‘jaligi bosh boshqarmasi mutaxassislari tomonidan o‘rganilib, ishlarni yanada jadallashtirish bo‘yicha tegishli ko‘rsatmalar berilmoqda.
Eslatib o'tamiz, hududlarda qor tozalash va obodonchilik ishlari uzluksiz davom ettiriladi.