Vazirligida ijtimoiy himoya sohasidagi muhim masalalar muhokama qilindi
2026-01-22 13:00:00 / Vazirlik yangiliklar
Bugun vazir o‘rinbosari Ozoda Jo‘rayeva boshchiligidagi mas’ullar Ijtimoiy himoya milliy agentligi vakillari hamda ushbu sohada xalqaro hamkor sifatida ishtirok etayotgan SOCIEUX dasturi ekspertlari bilan uchrashdilar.
Uchrashuv davomida ijtimoiy himoyaga muhtoj aholini qo‘llab-quvvatlash, jumladan:
- ijtimoiy uy-joy dasturlarini takomillashtirish;
- kam ta’minlangan va himoyaga muhtoj qatlamlarga kompleks ko‘mak ko‘rsatish masalalari atroflicha muhokama qilindi.
Xususan, Yevropa Ittifoqining SOCIEUX dasturi doirasida ekspertlar tomonidan ijtimoiy xizmatlar, ijtimoiy uy-joy siyosati va aholini qo‘llab-quvvatlash bo‘yicha ilg‘or tajribalar taqdim etildi. Ushbu tajribalarni milliy tizimga moslashtirish, sohada institutsional salohiyatni oshirish imkoniyatlari yuzasidan fikr almashildi.
Shuningdek, uchrashuv chog‘ida SOCIEUX dasturi ekspertlari vazirlik mas’ullariga o‘zlarini qiziqtirgan masalalar yuzasidan savollar bilan murojaat qildilar. O‘z navbatida, vazirlik tomonidan aholini ijtimoiy qo‘llab-quvvatlash, ijtimoiy uy-joy siyosatini olib borishda Yevropa davlatlarining ilg‘or tajribasi haqida atroflicha qiziqish bildirildi.
Mazkur muloqot aholining ijtimoiy farovonligini oshirish, fuqarolarni munosib uy-joy bilan ta’minlash hamda ijtimoiy himoya tizimini yanada samarali qilish yo‘lida muhim qadam bo‘ldi.