Arxitektura va qurilish sohasi faxriylari kengashining navbatdagi yig‘ilishi bo‘lib o‘tdi
2025-12-24 15:00:00 / Vazirlik yangiliklar
Unda Kengash faoliyatining bugungi holati, joriy yil davomida amalga oshirilgan ishlar hamda kelgusidagi ustuvor vazifalar muhokama qilindi.
Ta’kidlanganidek, tashkil topganiga qisqa vaqt bo‘lishiga qaramay, Kengash tomonidan tizimli va samarali ishlar amalga oshirildi. Xususan, soha bo‘yicha mingdan ortiq tashkilotlar ro‘yxati shakllantirilib, ularga murojaatlar yo‘llandi. Natijada faxriy nomzodlar bo‘yicha hujjatlar yig‘ilib, ishchi komissiya tomonidan ko‘rib chiqildi va belgilangan tartibda qabul qilindi. Ayrim hujjatlar qayta ishlash uchun qaytarilib, kamchiliklar bartaraf etilgach, ular ham tasdiqlandi.
Yig‘ilishda “Ustoz–shogird” an’analarini rivojlantirish masalasiga alohida e’tibor qaratildi. Faxriylar ishtirokida respublika bo‘yicha oliy ta’lim muassasalarida talabalar bilan uchrashuvlar va davra suhbatlarini tashkil etish bo‘yicha reja-grafik tasdiqlangani qayd etildi. Ushbu tadbirlar yoshlarni vatanparvarlik, mehnatsevarlik va kasbiy qadriyatlar ruhida tarbiyalashga xizmat qilmoqda.
Shuningdek, faxriylarning sog‘lig‘ini mustahkamlash va ijtimoiy qo‘llab-quvvatlash yo‘nalishida dam olish hamda davolanish tadbirlarini tashkil etish bo‘yicha amalga oshirilgan ishlar muhokama qilindi. Soha faxriylarini sanatoriy va dam olish maskanlariga yo‘naltirish bo‘yicha tegishli tashkilotlar bilan hamkorlik yo‘lga qo‘yilgani ta’kidlandi.
Yig‘ilish yakunida Kengash tomonidan shaharsozlik va arxitektura sohasini rivojlantirishga oid taklif va tavsiyalar ishlab chiqilgani, shuningdek, 2026-yilda amalga oshirilishi rejalashtirilgan vazifalar yuzasidan fikr almashildi. Kelgusida faxriylarning boy tajribasidan keng foydalanish va ularni soha rivojiga faol jalb etish ishlari izchil davom ettirilishi qayd etildi.