Turkiyada qurilish sohasiga oid xalqaro ishchi seminar boshlandi
2025-12-13 15:00:00 / Vazirlik yangiliklar
Turkiyada Oliy texnik kengash tashabbusi bilan qurilish sohasida hamkorlikni rivojlantirishga qaratilgan xalqaro ishchi seminar oʻz ishini boshladi. Tadbirda Turkiya bilan bir qatorda Ozarbayjon, Qozogʻiston, Tojikiston, Shimoliy Kipr Turk Respublikasi hamda Oʻzbekiston delegatsiyalari ishtirok etmoqda. Seminar doirasida Oʻzbekiston Respublikasi Qurilish va uy-joy kommunal xoʻjaligi vazirligi vakillari ham sohaga oid tajriba almashish va hamkorlik jarayonlarida faol qatnashmoqda.
Bugun, 13-dekabr kuni seminar rasmiy ochilish marosimi bilan boshlandi. Tadbirda Oliy texnik kengash raisi Ertan Yetim, delegatsiyalar rahbarlari hamda akademik doira vakillari ishtirok etdi. Kun davomida qurilishda narxlarni shakllanishi, tenderlarni tashkil etish, shartnomalarni shakllantirish, qurilish muddatlarni qayta ko’rib chiqish muammolari hamda qurilish sohasida raqamlashtirish masalalariga oid mavzular ko’rib chiqilmoqda.
Shuningdek, ushbu mavzular yuzasidan taqdimot va erishilgan yutuqlarning muhokamasi oʻtkazilmoqda. Seminar ishtirokchilari uchun sohaga oid amaliy yondashuvlar va institutsional tajribalarni oʻrganish imkoniyati yaratildi.
Mazkur ishchi seminar bir necha kun davom etib, qurilish sohasida davlatlararo hamkorlikni chuqurlashtirish, texnik va tashkiliy mexanizmlarni takomillashtirishga xizmat qiladi.