Vazir o‘rinbosari Qibray tumanida rekonstruksiya ishlari holati bilan tanishdi
2025-12-13 14:00:00 / Vazirlik yangiliklar
Qurilish va uy-joy kommunal xo‘jaligi vaziri o‘rinbosari T.Alimatov boshchiligidagi ishchi guruhi Qibray tumanida ijtimoiy ahamiyatga ega obyektlarda amalga oshirilgan qurilish va rekonstruksiya ishlari holati bilan tanishdi.
O‘rganishlar davomida Respublika bolalar tayanch-harakat tizimi kasalliklari reabilitatsiya markazini rekonstruksiya qilish va jihozlash, shuningdek, uning quvvatini 100 o‘rindan 200 o‘ringa oshirish bo‘yicha bajarilgan ishlar ko‘zdan kechirildi.
Loyiha doirasida tibbiyot va yordamchi maqsadlarga mo‘ljallangan jami 7 ta bino rekonstruksiya qilindi. Jumladan, 1 ta bir qavatli, 4 ta ikki qavatli va 2 ta uch qavatli bloklar zamonaviy talablar asosida yangilandi. Obyektning umumiy maydoni 39 727,1 kvadrat metrni tashkil etib, qurilish, obodonlashtirish va qoplama ishlari belgilangan loyiha hujjatlariga muvofiq amalga oshirildi.
Ma’lumot o‘rnida qayd etilishicha, obyekt 2021-yil 10-iyun kuni Qurilish va uy-joy kommunal xo’jaligi sohasida nazorat qilish inspeksiyasidan belgilangan tartibda ro‘yxatdan o‘tkazilgan. Bugungi kunda qurilish ishlari to‘liq yakunlangan bo‘lib, obyektni foydalanishga topshirish bo‘yicha rasmiylashtirish jarayonlari olib borilmoqda.