PF-84: oziq-ovqat mahsulotlari xavfsizligiga oid davlat boshqaruvi va nazorati yagona tizim asosida tashkil etilmoqda
2026-07-09 16:40:00 / Yangiliklar
Davlatimiz rahbarining 2026-yil 12-maydagi “Oziq-ovqat mahsulotlari xavfsizligi, fitosanitariya va veterinariya sohalarida yagona davlat boshqaruvi va nazorat tizimini joriy etish chora-tadbirlari to‘g‘risida”gi PF–84-son Farmoni bilan mamlakatimizda oziq-ovqat mahsulotlari xavfsizligi, fitosanitariya va veterinariya sohalarida mutlaqo yangi davlat boshqaruvi tizimi joriy etildi.
Ushbu Farmonning maqsadi mamlakatimizda xavfsiz oziq-ovqat mahsulotlarini ishlab chiqarish, saqlash, tashish va iste’mol qilish bo‘yicha yagona, zamonaviy va xalqaro standartlarga asoslangan tizimni shakllantirishdir.
Oziq-ovqat mahsulotlari xavfsizligiga:
-o‘simliklar karantini;
- veterinariya;
- sanitariya-gigiyena;
- laboratoriya nazorati;
- eksport va import;
- bozor nazorati;
- sertifikatlash;
- monitoring kabi ko‘plab jarayonlar ta’sir ko‘rsatadi.
Avval ushbu vazifalar turli davlat idoralari tomonidan amalga oshirilardi. Bu esa ayrim holatlarda vazifalarning takrorlanishiga, xulosalar taqdim etilishda vaqt sarflanishi va tadbirkorlar uchun ortiqcha byurokratik to‘siqlarga sabab bo‘lardi.
Prezident Farmoni aynan shu muammolarni bartaraf etishga qaratilgan. Hujjatga muvofiq, oziq-ovqat mahsulotlari xavfsizligiga oid davlat boshqaruvi va nazorati yagona tizim asosida tashkil etilmoqda. Bunda
- O‘simliklar karantini va himoyasi agentligi;
- Veterinariya va chorvachilikni rivojlantirish qo‘mitasining tegishli funksiyalari;
- Sanitariya-epidemiologik osoyishtalik va jamoat salomatligi qo‘mitasining oziq-ovqat xavfsizligiga oid vazifalari birlashtirilib, Oziq-ovqat mahsulotlari xavfsizligi qo‘mitasi tashkil etildi.
Yangi tizimda asosiy e’tibor xavflarni barvaqt aniqlash va ularning oldini olishga qaratiladi. Bu esa xalqaro amaliyotda samarali yondashuv sifatida e’tirof etilgan.
Farmonda milliy qonunchilikni Codex Alimentarius, Jahon hayvonlar salomatligi tashkiloti (WOAH) hamda O‘simliklar karantini va himoyasi bo‘yicha xalqaro konvensiya (IPPC) talablariga muvofiqlashtirish ustuvor vazifa sifatida belgilangan. Bu esa mamlakatimiz mahsulotlarining xalqaro bozorlarda raqobatbardoshligini yanada oshirishga xizmat qiladi.