O‘zbekiston Respublikasi qishloq xo‘jaligi vazirligi huzuridagi o‘simliklar karantini va himoyasi agentligi

Oziq-ovqat mahsulotlari xavfsizligi tizimida korrupsiyaga qarshi kurashish, sohaga oid qonunchilikdagi yangiliklar, ochiqlik va shaffoflikni ta’minlash masalalariga bag‘ishlangan videokonferens aloqa formatida yig‘ilish bo‘lib o‘tdi.

Yig‘ilishda tizim tashkilotlari, hududiy boshqarmalar, tuman bo‘limlari rahbar va mutaxassislari, shuningdek respublikadan hududlarga biriktirilgan ishchi guruhlar a’zolari ishtirok etdi.

Tadbir davomida ishtirokchilarga “O‘zbekiston Respublikasining ayrim qonun hujjatlariga korrupsiyaga qarshi kurashish samaradorligini oshirishga, korrupsiyaga oid jinoyatlar uchun javobgarlik muqarrarligini ta’minlashga qaratilgan qo‘shimcha va o‘zgartirishlar kiritish to‘g‘risida”gi Qonunning mazmun-mohiyati tushuntirildi.

Xususan, qonun bilan davlat organlari va tashkilotlarida korrupsiyaning oldini olish mexanizmlarini takomillashtirish, mansabdor shaxslarning mas’uliyatini oshirish, davlat xizmatlarini ko‘rsatish jarayonlarida ochiqlik va hisobdorlikni kuchaytirish hamda korrupsiyaviy xavflarni barvaqt aniqlash va bartaraf etishga qaratilgan normalar nazarda tutilgani ta’kidlandi.

Shuningdek, yig‘ilishda ruxsat berish xususiyatiga ega bo‘lgan hujjatlar va sertifikatlarni, jumladan sertifikatlar, xalqaro namunadagi sertifikatlar hamda boshqa ruxsat beruvchi hujjatlarni rasmiylashtirish jarayonlarida shaffoflikni ta’minlash, inson omilini qisqartirish va korrupsiyaviy xavflarni oldini olish bo‘yicha amalga oshirilayotgan ishlar muhokama qilindi.

Yig‘ilish yakunida barcha rahbar va mas’ul xodimlarga korrupsiyaga qarshi murosasiz munosabatni shakllantirish, qonunchilik talablariga qat’iy rioya etish hamda xizmat vazifalarini halol va vijdonan bajarish bo‘yicha tegishli ko‘rsatmalar berildi.