Qishloq xo'jaligi mahsulotlari yetishtiruvchi va eksportchilari bilan uchrashuv o'tkazildi
2026-03-11 12:15:00 / Yangiliklar
O'simliklar karantini va himoyasi agentligi direktori Ibrohim Ergashev Andijon viloyati Asaka tumanida qishloq xo'jaligi mahsulotlari yetishtiruvchi va eksportchilari bilan uchrashuv o'tkazdi. Tadbirda bog‘dorchilik fermer xo‘jaliklari rahbarlari, hududlardagi qishloq xo‘jaligi bo‘limlari mas’ul rahbarlari, O‘simliklar karantini va himoyasi bo‘limlari boshliqlari, agronomlar, inspektorlar hamda soha mutaxassislari ishtirok etdi.
Uchrashuvda qishloq xo‘jaligi mahsulotlarini sifatli yetishtirish va eksport qilishda muhim jihatlar e’tibor markazida bo'ldi.
Mahsulotlarni fitosanitar sof holatda bo’lishi, pishib yetilganligi, to‘g‘ri kalibrlash va sifatli qadoqlash eksport madaniyatining muhim ko’rsatkichlari ekanligi alohida qayd etildi.
Oʻzbekiston Respublikasi Prezidentining 465-sonli qaroriga asosan mahsulotlarni dala chetlaridan boshlab organik usulda yetishtirish, mavjud yer va suv resurslaridan samarali foydalanish, ilg‘or texnologiyalarni joriy etish orqali mahsulot yetishtirish hajmini oshirish zarurligi ta'kidlandi.
Jahon tajribasi va bozor tendensiyalariga mos, raqobatbardosh mahsulotlar yetishtirish orqali yangi eksport bozorlarini kengaytirish masalalari muhokama etildi.
Tadbir davomida ishtirokchilar o‘zlarini qiziqtirgan savollar va sohada uchrayotgan muammolar yuzasidan murojaat qildilar. Mazkur murojaatlar ko'rib chiqilib, muammoli vaziyatlarni bartaraf etish bo'yicha choralar ko'rildi, tavsiya va ko'rsatmalar berildi.