Jizzax va Eronning Markaziy viloyati o‘rtasida hamkorlikning yangi istiqbollari muhokama qilindi
2026-08-19 15:00:00 / Yangiliklar
Uchrashuvda ikki hudud o‘rtasida savdo-iqtisodiy, investitsiyaviy va ishbilarmonlik aloqalarini yanada rivojlantirish, yangi qo‘shma loyihalarni amalga oshirish masalalari muhokama qilindi.
Jizzax viloyati hokimi Ulug‘bek Mustafoyev Eron delegatsiyasini Jizzax zaminida ko‘rib turganidan mamnunligini bildirib, ikki hudud o‘rtasidagi hamkorlikni yangi bosqichga olib chiqishga tayyor ekanini ta’kidladi.
— Jizzax viloyati Eronning hududlari bilan o‘zaro manfaatli hamkorlikni rivojlantirishdan manfaatdor. Xususan, savdo-iqtisodiy aloqalarni kengaytirish, investitsiyalarni jalb qilish, eksport salohiyatini oshirish va qo‘shma loyihalarni amalga oshirish uchun barcha imkoniyatlar mavjud, — dedi viloyat hokimi.
O‘z navbatida, Eron Islom Respublikasi Markaziy viloyati hokimi Mehdi Zandiya Vakiliy qabul uchun minnatdorlik bildirib, Jizzax viloyati bilan turli sohalardagi hamkorlikni rivojlantirishga tayyorligini bildirdi.
Uchrashuv davomida Jizzax shahrida Eron Islom Respublikasining Markaziy viloyati delegatsiyasi vakillari ishtirokida O‘zbekiston–Eron biznes-forumi hamda tadbirkorlar o‘rtasida B2B va G2B uchrashuvlari o‘tkazilishi ta’kidlandi.
Biznes-forum doirasida eronlik tadbirkorlar qishloq xo‘jaligi va oziq-ovqat sanoati, neft-gaz va neft-kimyo sanoati, metall va konchilik sanoati, avtomobilsozlik va ehtiyot qismlar ishlab chiqarish, to‘qimachilik sanoati, shuningdek, sanoat va ishlab chiqarish kabi 6 ta asosiy yo‘nalishda ishtirok etadi.
Muloqotlarda tadbirkorlar o‘rtasida to‘g‘ridan-to‘g‘ri aloqalarni o‘rnatish, investitsiyaviy va eksport loyihalarini muhokama qilish, qo‘shma korxonalar tashkil etish hamda o‘zaro manfaatli biznes munosabatlarni yo‘lga qo‘yish masalalariga alohida e’tibor qaratiladi.
Shu munosabat bilan Jizzaxlik yosh tadbirkorlar Eron ishbilarmon doiralari bilan yangi hamkorlik aloqalarini o‘rnatish, investitsiya va eksport loyihalarini muhokama qilish hamda istiqbolli biznes tashabbuslarni amalga oshirish maqsadida O‘zbekiston–Eron biznes-forumida faol ishtirok etishga taklif etiladi.
Uchrashuv yakunida ikki hudud o‘rtasidagi hamkorlik memorandumi imzolanib, mavjud salohiyatdan samarali foydalanish va yangi qo‘shma loyihalarni hayotga tatbiq etish bo‘yicha fikr almashildi.