Jizzах vilоyati hоkimligi

Prezident tashrifidan so‘ng belgilangan vazifalar amalda o‘z ifodasini topib, ta’lim, ishlab chiqarish va innovatsiyalarni birlashtirgan yangi tizim shakllanmoqda.

Bugun raqobatbardoshlik, avvalo, inson kapitali sifati bilan belgilanadi. Shu nuqtayi nazardan, Jizzax politexnika instituti huzurida tashkil etilgan Muhandislik maktabi mamlakat sanoat taraqqiyotidagi muhim loyihalardan biriga aylandi.

2025–2026 o‘quv yilidan boshlab “O‘zavtosanoat” AJ, “BYD Uzbekistan Factory” qo‘shma korxonasi hamda “ADM Jizzax” avtomobil zavodi bilan hamkorlikda Muhandislik maktabi faoliyati yo‘lga qo‘yildi. O‘zbekiston Respublikasi Prezidentining 2025-yil 2 dekabrdagi tashrifi mazkur tashabbusni yangi bosqichga olib chiqdi.

Muhandislik maktabining asosiy maqsadi — avtomobilsozlik va ishlab chiqarish tarmoqlari uchun zamonaviy texnologiyalarni puxta o‘zlashtirgan, xalqaro talablarga javob beradigan muhandis kadrlarni tayyorlashdir.

Bu vazifa to‘rtta ustuvor yo‘nalish asosida amalga oshirilmoqda. Dual ta’lim tizimi asosida har yili 150 nafardan ortiq muhandis tayyorlanmoqda. Yiliga 300 nafargacha mutaxassis malakasini oshirmoqda. Qisqa muddatli kurslarda 250 nafar fuqaro zamonaviy kasblarga o‘qitilmoqda. Shuningdek, har yili 200 nafargacha yoshlar va tadbirkorlar kasb-hunar yo‘nalishlarida malaka oshirmoqda.

Muhandislik maktabida 16 ta yangi ta’lim dasturi joriy etilgan. Eng muhim innovatsion loyihalardan biri — avtomobil ishlab chiqarishning asosiy bosqichlarini qamrab olgan mini-konveyer liniyasi hisoblanadi. Bu yerda talabalar haqiqiy ishlab chiqarish muhitiga yaqin sharoitda amaliy ko‘nikmalarni egallab, robotlashtirilgan uskunalar, sifat nazorati, “Lean Manufacturing” tamoyillari va mehnat xavfsizligi bo‘yicha tajriba orttirmoqda.

Shu bilan birga, mashinasozlik texnologiyasi, elektron texnikalarni montaj qilish va sozlash, elektrotexnika vositalariga xizmat ko‘rsatish, kompyuter grafikasi va multimedia tizimlari, kompyuter injiniringi hamda avtomobillarga texnik xizmat ko‘rsatish kabi oltita yo‘nalish bo‘yicha kasbga tayyorlash ishlari yo‘lga qo‘yilgan. Bitiruvchilarga berilayotgan kasbiy sertifikatlar ularning mehnat bozoridagi raqobatbardoshligini oshirmoqda.

Muhandislik maktabi ijtimoiy ahamiyatga ega loyihalarni ham amalga oshirmoqda. Jumladan, ijtimoiy himoya reyestridagi oilalar farzandlari uchun “Zamonaviy elektromobillarga texnik xizmat ko‘rsatish” dasturi bo‘yicha maxsus kurslar tashkil etildi.
Shuningdek, Toshkent shahridagi 1-sonli texnikumning 32 nafar o‘quvchisi uchun maxsus kurs o‘tkazildi. Ularning 14 nafari bilan Jizzax politexnika institutiga suhbat asosida qabul qilish bo‘yicha kelishuvga erishildi. Tinglovchilarning “BYD Uzbekistan Factory” qo‘shma korxonasidagi amaliyoti ham tashkil etildi.

Bugungi kunda Muhandislik maktabi Toshkent shahrining Chilonzor va Sergeli tumanlari texnikumlari hamda Urganch texnikumi bilan hamkorlik qilmoqda. Bu tajribani respublika miqyosida kengaytirish uchun mustahkam zamin yaratmoqda.

Mutaxassislar fikricha, mazkur tajriba ta’lim va ishlab chiqarish integratsiyasining samarali namunasini yaratmoqda. Eng muhimi, kadrlar tayyorlash jarayoni mehnat bozori ehtiyojlaridan kelib chiqib tashkil etilmoqda. Jizzaxda shakllanayotgan mazkur tajriba Yangi O‘zbekistonda ilm-fan, innovatsiya va sanoat uyg‘unligi asosida raqobatbardosh iqtisodiyot uchun inson kapitalini shakllantirishga qaratilgan strategik yondashuvning amaliy ifodasi bo‘lib xizmat qilmoqda.