Jizzах vilоyati hоkimligi

Uning muvaffaqiyat yo‘li bepul o‘quv kursidan boshlandi. Suxrob Bahodirov Forish tumani Ko‘hnabozor qishlog‘i, Amir Temur mahallasida istiqomat qiladi. Yigirma yoshni qarshilagan qahramonimizning garchi imkoniyati cheklangan bo‘lsa-da, umidlari, ko‘zlagan maqsadlari bisyor. Sharoit taqozosi bilan u biron yo‘nalishda o‘qimagan va ishsiz edi.

Ana shunday kunlarning birida Suxrob yoshlar uchun bepul o‘quv kurslari haqidagi xabarni eshitib, bu imkoniyatdan samarali foydalanishni maqsad qildi. Manzil bo‘yicha murojaat qilib SMM bo‘yicha ta’lim ola boshladi.

– Bir yarim oy davom etgan kurslar onlayn va oflayn shaklda tashkil etildi. Tinglovchilar uchun 90 ta video dars hamda uch marotaba amaliy mashg‘ulotlar o‘tkazildi, – deydi u.

Mashg‘ulotlar davomida Suxrob ijtimoiy tarmoqlarda sahifalarni rivojlantirish, SMM xizmatlarini mijozlarga taklif etish, shuningdek, sun’iy intellekt texnologiyalari yordamida videoroliklar tayyorlash bo‘yicha muhim bilim va ko‘nikmalarni egalladi.
– Mazkur kursda o‘qishim hayotimda katta burilish yasadi. Biron yerda ishlash uchun kasbim va imkoniyatim yo‘q edi. Bepul o‘quv kursi haqida eshitganimda nimadir o‘rganish uchun imkoniyat tug‘ilganidan juda xursand bo‘ldim. Kursga borganimda darslardagi har bir jarayonni qunt bilan o‘rganishga harakat qildim. Natijada shu sohani ozmi-ko‘pmi o‘zlashtirdim.

Suhrob tengqurlari bo‘lgan yoshlarni ham ilm olishga, doim oldinga intilishga chorlaydi. U har qanday ishning o‘z qiyinchiligi bo‘ladi, lekin insonda qat’iyat va sabr bo‘lsa, imkonsizdek tuyilgan maqsadga ham erishish mumkin, deya ta’kidladi. Eng muhimi, harakat qilishdan to‘xtamaslik kerak. harakat bizdan, natija esa Yaratgandan.

O‘quv mashg‘ulotlaridan so‘ng Suhrob shu yo‘nalishda bemalol faoliyat boshlashini tasdiqlovchi sertifikatga ega bo‘ldi. U yaqin kunlarda Forish tumani hokimligida SMM mutaxassisi sifatida faoliyat boshlashni rejalashtirmoqda.

Shu bilan birga, u mobilografiya yo‘nalishini ham o‘rganib, zamonaviy mediamahsulotlar yaratish sohasida o‘z imkoniyatlarini yanada kengaytirishni niyat qilgan.

Bugun yurtimizda Suhrob kabi ilmga chanqoq yoshlar uchun keng imkoniyatlar mujassam. Prezident Administratsiyasi huzuridagi OAV uchun Kontent tayyorlash markazi hamda Yoshlar ishlari agentligi hamkorligida joriy yildan «SMM AI Savodxon”, “Yosh mobilograf” kabi loyihalar ham aynan yoshlarga zamonaviy kasblarga o‘rgatishga xizmat qilayotir. Loyiha doirasida 18-30 yoshgacha bo‘lgan yurtdoshlarimiz uchun o‘quv dasturi yo‘lga qo‘yilgan bo‘lib, unda minglab yoshlar raqamli marketing va sun’iy intellekt imkoniyatlaridan samarali foydalanish bo‘yicha bilim va ko‘nikmalarga ega bo‘lishmoqda.

Darslarning kamida 87 foizini o‘zlashtirgan ishtirokchilarga rasmiy sertifikatlar topshirilayotir. E’tiborlisi, kontent markazi tomonidan sertifikatga ega bo‘lgan yoshlarga o‘z faoliyatini yo‘lga qo‘yishlari uchun ishga joylashishlariga, shu bilan birga biznes g‘oyalarini amalga oshirmoqchi bo‘lganlarga 50 million so‘mgacha imtiyozli moliyaviy ko‘mak berilayapti.

Yoshlarni qo‘llab-quvvatlash borasidagi bu kabi loyihalarni yana ko‘plab misol keltirsa bo‘ladi. Muhimi, kelajagimiz egalari imkoniyatlardan unumli foydalanib, vataniga munosib farzand bo‘lishga intilishsa bas.