Jizzax viloyati delegatsiyasi Koreyaning avtomobilsozlik kompaniyasi bilan hamkorlik istiqbollarini muhokama qildi
2026-06-13 12:10:00 / Yangiliklar
Mazkur korxona avtomobilsozlik sanoati uchun butlovchi qismlar ishlab chiqarishga ixtisoslashgan bo‘lib, shuningdek, press-qoliplar (shtamplar), maxsus moslamalar va texnologik jihozlarni loyihalash hamda ishlab chiqarish bilan shug‘ullanadi. Bugungi kunda kompaniya “Hyundai” va “KIA” kabi yirik avtomobil ishlab chiqaruvchilariga ehtiyot qismlar yetkazib berib kelmoqda.
Tashrif davomida kompaniya faoliyati bilan yaqindan tanishilib, o‘zaro hamkorlik istiqbollari yuzasidan muzokaralar o‘tkazildi. Uchrashuv chog‘ida kompaniya rahbariyati Jizzax viloyatida faoliyat yuritayotgan avtomobil ishlab chiqaruvchi korxonalar bilan hamkorlik qilishga qiziqish bildirib, hududda yangi investitsiya loyihalarini amalga oshirish istagi mavjudligini ma’lum qildi.
Muzokaralar yakunlari bo‘yicha tomonlar avtomobilsozlik sohasida hamkorlik aloqalarini rivojlantirish, zamonaviy texnologiyalarni joriy etish va istiqbolli investitsiya loyihalarini amalga oshirish imkoniyatlarini birgalikda o‘rganishga kelishib oldilar.
Ushbu hamkorlik Jizzax viloyatida avtomobilsozlik sanoatini yanada rivojlantirish, mahalliylashtirish darajasini oshirish hamda yangi ish o‘rinlarini yaratishga xizmat qilishi kutilmoqda.